Ka Hospital AIIMS ha Assam, jaka shna Phlim ha Arunachal:Jaitley rKiew dor u sikret bad ka petrol, diesel na ka mang pisa

New Delhi, 1 Lber:
U myntri kam pla pisa ka sorkar India, U Arun Jaitley, ha ka sngi saitjain, ula pynbna ia ka mang pisa kaba T.2,362.74 klur, na bynta ka thain shatei lam mihngi bad ula kular ruh ban wan rah ia ka jinglong jingman jong ka thain, kumba long lem ka Ri hi baroh kawei.
“Nga la mang T. 2,362.74 klur, sha ka Development of North Eastern Region (DoNER). Ka mang kaba kham kyrpang, ka long naka bynta ka roi ka par jong ka thain shatei lam mihngi. Ka jingmang ia ka kam pynroi, ka dei hadien ka jingleit jngoh jong u myntri rangbahduh arsien sha katei ka thain bad ka jingpyntreikam ia ki kam pynroi ha ka jinglong kyllum jong ka thain.
U myntri, u iathuh ba ka sorkar kan buh ia ka jaka thaw phlim ha Arunachal Pradesh bad nangta sa ka hospital ka ban long kum ka All India Institute of Medical Sciences (AIIMS) ha Assam. La mang ruh ia ka pisa, na ka bynta ban pyntreikam ia ka telebishon channel ka ban pyntreikam 24×7, ka ban ai kyrteng Arun Prabha bad ka mang pisa, na ka bynta katei ka long T.1,825.45.
Ka mang pisa kaba T.1,000klur, ka long na ka bynta ka kam pyniaid rel bad nangta sa T.2hajar klur, na ka bynta kam shna surok. Ka sorkar, ka la mang ruh ban shna surok, kiba lah ban long na ka bynta baroh saw aiom, ha kaba yn thaw ia kitei ki surok, ha ki khappud jong ka Sino – India bad jong ka India Pakistan.
Na ka liang jong ka tnat Development of North Eastern Region (DoNER), ka ioh ia ka bhah, kaba kiew haduh 29.43 percent, kaba dei ka bhah, na ka bynta ka roi ka par jong ka thain shatei lam mihng. Ha katei ka mang pisa, la pynkiew sha ka T.2,362.74klur, na kabalong T.1,825klur, kaba la mang ha u snem ba ladep, ha kaba ka jingkiew dor jong katei ka mang pisa, ka tam da 26 percent, na kaba la mang ha u snem ba ladep.
Ki ban kham rem, ha kane ka mang pisa kaba mynta, ki long u sikret, ka dew bilat, kaba leit jingleit na suin, kaba leit dih sha bad bam ja ha ki dukan, ki jaka pynbhabriew met jong ki kynthei.
Ha katei hi kajuh ka sngi, hadien ba la pynbna ia ka mang pisa, la pynkiew dor ia ka Petrol, da T.3.18pisa, katba ka Diesel, ka kiew dor da T.3.09pisa shi litar bad katei ka la treikam naduh hynnin hi ka miet sngi Saitjain.