Ther bom hajan ka skul ha Kabul, iap 53ngut, bun ki khynnah kynthei

Kabul: Hynnin ka sngi, ka la don ka jingbthei bom kaba jur ha ka nongbah Kabul, kaba la jia hajan kawei ka skul jong ki kynthei.

Katei ka jingbthei, ka la pyniap ei ia 53ngut ki briew, ong ka khubor jong ka Ministry of Public Health. Kiba iap, ki dei kiba hapdeng 11 haduh 15 snem ka rta. La iathuh ba ka jingbthei, ka jia, ha ka por ba ki khynnah skul, ki dang ia mih na skul, ha ka por shiteng sngi.

Ka jingbthei, ka la jia lai sien, hajan ka Sayed-ul-Shuhada High School, kaba don sha sepngi jong ka Kabul. Ka don shwa ka jingbthei bom, ha kawei ka kali bad hadien kata, ka don sa ka jingpynher da ki roket sha katei ka jaka.

Ka Taliban, ka pynrem jur halor katei ka jingjia, kaba thew ia ki khynnah skul bad ia ki riew paidbah bad ka kyntait, ba ka don kti ha katei ka jingjia. La iathuh ba kiba bun, na kitei kiba iap, ki dei ki khynnah kynthei.