BALEI IA NGA

S.K.N

[ba bteng] “Tip shuh Nia… Ni kaba jynjar kumne kein tang shu dei kam bad pulit…” La bynrap ktien ka Niakha.

Hadien shiphang ba ki ap hangta, la wan ai ha ka Kmie Rida ia ka envelop bad la bthah ba kan pule pat sha iing. Uta uba wanrah u la bthah ruh ia ki ba ki lah ban leit phai noh sha iing.
Kumta bran ki leit phai noh sha iing. Ha ka jingshisha ka Niakha ka nang pyrkhat ban leit shong dukan hadien ba la wanphai na Thanat; hynrei tang namar kata ka shithi, ka la hab ban leit phai biang sha Jaiaw shyiap sha iing ka Rida.
Marsien poi ha iing, ki la ia pule ia ka shithi bad ki shem ba la phah wan sa ia ka Rida kaba dei ka nongshah leh jubor ban tohkit ia ka namar ka jingbym shai bha ka sabut na ka nongujor.
Marsien ioh sngew ia kata ka Rida ka la shu kylli kynsan
“Lano Niakha…?”

“La shi sngi…” La jubab ka Niakha
“Ni, ngam sngewthuh shuh balei kumne ia nga ka wan jia…” La mih ka sur na ktien ka Rida bad ka kem shoh tlot kynsan hangta ngai.
Ka Rida ka la shu sngap noh jak khlem kren briew shuh. Hadien kata ka Niakha jong ka, ka la ong
“Rida phin hab khreh ban ia leit la shi sngi…” Ka da peit artat sha ka Rida
“Hooid to Niakha…” La jubab ka Rida watla ha dohnud ka la sngew eh bha.
Hadien ba la ia kren baroh ki kam ka Niakha ka mih noh nangta bad ka leit bran sha Iew.
Ka Rida ka la kylli bniah na la ka Kmie ia kaei ba la ong ha ka shithi. Ka Kmie jong ka, ka la shu ai beit da ka shithi ba kan pule hi.
“Ka hukum ka ain phan ym lah ban kyntait phan hab leit beit…” La bynrap ktien ka Kmie katba ka Rida ka dang pule ia ka shithi.
“Lada ngan kyntait ruh sa tang ban shah shong ruh nar….” La ong pat sa ka Rida
“Hooid pha pynkhreh bha ia ioh kyrtoh kylla, namar kane ka jia dei ba pha la ia leh sngewthuh jingmut haduh ba u Panah jong pha u la niewkor iapha ban ianga ka lok…” La kren ka Kmie da ka sur ba dom.

Ka Rida ka la shu sngap noh kam lait ang shuh halor kaei kaba ka Kmie ka kren.
Ka jingshah khot hajir ka la nang buh jingeh ia ka jingmut jingpyrkhat ka Rida. Mynta ka sngewthuh ba hapdeng ka jingarmet kan hab ban iaid lyngba sa ka jah burom kaba khraw ha khmat ki pulit. Ka sngewthuh ruh ba kiwei kin tip lut shaphang kaba jia ia ka. Ym tang ka Rida hynrei na ka liang ka Kmie jong ka ruh ka sngewsih bha ia kaei kaba jia ha ka iing jong ka. Kane ka jingsngew ka la ktah jur ia ka mynsiem jong ka bad kam kwah shuh wat tang ban kren ia la ka khun.
Ha kata ka miet ka Rida kam nang iohthiah shuh. Ka la lynga ka la pisa bad ka la shu pyrkhat sah ia kaei ka ban jia ynda ka la kha ia i khun ba ka pun hapoh kpoh.

Kumta hapdeng kata ka jingbym sngew lah shuh ban pyrkhat ia la ka jingim, ka la shim ia ka rai ban pyniap noh ialade da kaba shu sdien phasi. Jroit ka khie naba thiah ka sngew ba kata ka rukom pyrkhat ka long shisha kaba dei ban pynkut noh ia la ka jingim khnang ba ki jingeh baroh kiba mih bad ki ban dang wan ha ka jingim jong ka kin ym pyndik shuh la ka long ia ka ne ia ka Kmie jong ka.
“Shuh ngan leh noh shisha kumta namar kam myntoi shuh ia nga ban im ha kane ka pyrthei. Hynrei shuwa ba ngan leh nga dei ban da pyntip khnang ba kan ym sah umdum…” Ka la kren wei briew.
Ka wad ia ka kot sada bad u khulom ka sdang ban thoh halor ka daw jong ka jingrai jong ka ban shim noh ia la ka jingim. [yn dang bteng]