Dawa sa U James, da ka kynhun tohkit, halor ka MeECL

Shillong:U myntri ba dei peit ia ka tnad bording ha ka jylla, u James P.K Sangma u la ong ba na ka liang jong u, u pdiang sngewbha lada ka sorkar ka thung ia ka kynhun tohkit ba laitluid halor ka kynrum kynram ha MeECL.

Haba ia kren bad ki lad pathai khubor, u Sangma, u la ong ba na ka liang jong u, u la dep ban iakren bad u myntri rangbah ka jylla u Conrad K Sangma ba kan bha lada thung da ka kynhun tohkit halor ki kynrum kynram ha MeECL ha kaba kane kan sei madan ia baroh ki kam ki bym iaid beit ha MeECL. U la ong ruh ba lada ka don ka jingtohkit ha MeECL kan lah ban wanrah ia kiba bun ki jingshisha, halor ki jingshah kynnoh ha MeECL kum ka jingleh shiliang ia ki jingai tender, halor ka jingkynnoh ba don ka jingthepkam ia kiba ha ing ha sem jong ki ophisar, ka jingtuh ia ka bording, ha kaba la wan rah ia ka jingduh nong kaba da ki klur ki klur ia ka MeECL.

“Kane ka jingtohkit ka long kaba donkam ban wan rah ia ka jingshisha shakhmat bad ka jingtohkit ka ba lait luid kan lah ban wanrah shakhmat ia ki jingbym pyntrei hok baroh ha ka ba kane kan ai ka lad ka lynti ia ka sorkar ba kan ioh ban pynbha bad ban weng ia ki jingeh ha ka MeECL,” u la ong.