“Palat mar shiteng, kim don ia ka jingdonkam ba kongsan”

Shillong,
26 Rymphang:
U myntri ka tnad kam pynroi nongkyndong u bah Prestone Tynsong u la ong ba na  ki 6,250 tylli ki shnong nongkyndong, mar shiteng kim pat don kiba biang ia ki jingdon kam ba kongsan kum ka iing ka sem, ka umbam umdih bad kiwei kiwei de ki jingdonkam.
U la ong ba tang 50% ruh ki nongshong shnong kim ioh ia kum kine ki jingdonkam kaba bit ba biang kynthup ha ka liang ka koit ka khiah ki lad jingsumar.
“To ngin iatrei ngin pyrshang ban pyndap ia kine ki jingduna ha nong kyndong”, la ong u bah Tynsong haba kren ha ka Special Outreach Programmes (SOPs) ba pyn long da ka Directorate jong ka Field Publicity ka tnad jong ka Information and Broadcasting, Regional Office, MMT Region, Shillong.
Ia kane ka SOPs la pynlong ha lai tylli ki jylla jong ka dong Mihnngi halor ka phang ka ‘Prime Minister Jan Dhan Yojana (PMJDY), Swachh Bharat Abhiyan (SBA) bad Beti Bachao, Beti Padhao (BB, BP)’.
Ia kane ka SOP la wanrah da ka tnad jong ka Information and Broadcasting, ka sorkar  India ha u bnai Nohprah, 2014 na bynta ban pynphriang ia ka jimngtip halor ka skhim PMJDY, SBA bad BB, BP sha ki paidbah jong kine ki lai tylli ki jylla kynthup ka Meghalaya, Mizoram bad Tripura (MMT).
Shi bynta ban pynsaphriang ia kane ka SOPs, la pynlong da ka jingpyni ia ki phlim, ki jingialang paidbah, ki jingiakren bad ki jingiakop bapher bapher. Haduh mynta ka SOPs  ka la lah ban pynsaphriang ia kine ki skhim sha ki 22,000 ngut ki paidbah jong kine ki lai tyllil ki jylla.
Ha kane ka sngi la ioh ka jingkren na u Dr Engam Pame u Director ka DFP, u bah  OL Marbaniang uba dei u FPO barim nalor kine la donlang ki nongmihkhmat na ki seng bapher bapher.
Shwa ia kane ki Field Officers na ki lai tylli jylla ki la ai ka kaiphod halor ka SOPs  kaba la iaid lai bnai haduh mynta.