Ha kine ki sngi bad ki taiew ba la leit noh, ngi la iohi shibun ki jingkynthoh na ka liang ka UDP khamtam ia ki kynrum kynram ha MeECL bad ka jingdawa ban weng ia kito kiba don ha ka bor na ka bynta ban ioh iaid shaphrang ia kata ka jingtohkit ba laitluid. Kine baroh ki la sdang da ka jingthoh shithi ka jong u General Secretary jong ka seng UDP sha u Myntri Rangbah.
Haba ngi phai sha ka sainpyrthei ha ka Jylla, ngi iohi ba u Myntri ba dei ban peit ia ka Tnad Kam Pohiing u dei na ka seng Riewlum UDP. Kane ka tnad ka dei kawei na kiba donkam shikatdei eh namar ka iadei bad ka suk ka sain, ban tehlakam ia ki kam sniew kam tuh ha ka Jylla. Hynrei kyrtoh khongpong pynban haba ngi peit ia ka jingtrei kam jong kane ka tnad, ha ka jaka ba ngin iohi ia ka jingiaid beit iaid ryntih, phewse nang jyllei da ki kam sniew kam smeh. Nang I shyrkhei nang I smiej bad nang bun ka jingshah thombor ki para doh para snam khamtam eh ha ki bar jylla.
Ngin ia peit ia ki katto katne ki jingbud ter ter jong ki jingjia kum ka jingshah pyniap jong u Rangbah, u Lurshai Hynniewta namar ka jingiakhih jaitbynriew bad ka jingiakynad bad ki bar jylla.
Lah iohi shynna ba ki pulit kiba pahara ha kato ka por ki shu long tang kita ki nongpeit kai ba kyllut ba matlah. Ka jingshah pyniap ka jong u Phershanroy Myrthong uba dei na Wahkaji ha Golklinks, ngi iohi ia ka jingjlan jong ka jingtohkit ban ioh kem ia kiba donkti ha kum kane ka kam bym salia ban shim ia ka mynsiem briew ruh. Ha ka khubor ba mih lyngba ka press release ba lah ioh kem ia kiba donkti hynrei kim dei kita ki mynder Ri (Not non-tribals), kaba don jingmut aiu kane ban pynksan ia ki briew ba dei bar jylla?
Ym don shuh kata ka jingshongsuk shongsain, jingbym tieng bym smiej ha la ka bri ka khyndew ia ki kynthei, ki longkmie, ki samla samhoi, ki khyllung khynnah. Ka jingshahleh beijot jong ka khynnah ba dang 16 snem ha West Garo Hills bad ki 3-4 ngut ki riewbymman kiba donkti ha kane ka kam kim pat shah kem. Ki Garo ruh ki hap hapoh ka jingpeit jong ka Meghalaya, balei ka jinglong jingman, ka jingim ka jong ki kam long kaba kordor? Kim khein kor shuh mo ia ka longrynieng manrynieng jong ki kynthei ha kane ka Jylla ka jong ngi? Ka jingjia ba dang shen ha ka shnong Mawsikar ruh ka pynkynmaw ia ngi ia ka jingshah thombor ka jong ki kynthei ha kapor ba wan ki shipai phareng. Ym don shuh ka jingshongshngain ha la ki Ri bad lah shu syier shu smiej lada leit shano shano ruh. Kum ban shu pynkynmaw kine ki samla ki dang mut leit jingiaseng por mynsngi ha kaba ki pulit Assam na ka ktem jong ki, ki kthong bad thmu ban batbor ia kine ki 3ngut ki kynthei.
Balei ka UDP kam iohi mo ia kine ki jingshah thombor jong ki khun kynthei ka Jylla bad ia kine ki nongleh ia kine ki kam sang? Ka UDP kaba kam ialade kum ka seng Riewlum bad ka seng kaba peit ia ka bha ka miat jong ki khun ka bri. Balei kim bishar shuwa ia u Myntri na ka seng ka jong ki, u bah Rymbui uba bat ia ka portfolio kaba khraw ha ka Jylla? Balei kim buh jingkylli ia u bad ia ka Tnad hi baroh kawei ia ka jingjyllei ki kam sniew kam smeh, kam tuh kam thiem, jingshahthombor u para doh para snam, ka jingshahpyniap bad khlem don shuh kata ka jingsngewlem khyndiat ruh?
Kaba sammut ha kine ki taiew ba la leit noh ka long ba kane ka seng ka la khohreh ban iakhun ha ka election GHADC, ban leit kular ba kin wanrah jingbha ia ki riewlum Garo. Hynrei ki dang nud toi ban leit tuklar ia kiwei ki Myntri jong kiwei pat ki tnad ban kdew kti ia ki hynrei ki leh matlah ia ka jingdkoh jong ka Tnad treikam ba dei peit u bah Lahkmen Rymbui la ka dei ha ka Tnad ki Kam Pohiing lane ka Tnad Jingpule puthi.
Ka Seng Riewlum UDP kam lah ban pyniaid beit iaid ryntih ia ki kam ki jam ban wanrah ia ka jingkiew, ka jingroi jingpar ha la ka khyndew ka bri, balei kein ki kwah rhah ban leit sa sha ri lum Garo? Ngi iohi ruh kumno ba ki Garo namar ki lah don lypa ki nongmihkhmat jong ki, ki para doh para snam kiba biang, bad ki khlem pynjop hi iano iano na ka seng UDP namar ki tip ba kin nym iohi ia ka roi ka par lada ki jied ia ki nongmihkhmat na kane ka seng.
Damang Kynsai Rynjah,
Shillong – 793015,
Meghalaya.
👏👍