Shah daiñ kuna kumba 1000 tyngka ki kali bad ki thuk thuk ha ka jylla ki bym biang car pass

Shillong: Hadien ba la iohi ia ka jingsaitlah jong ki paidbah ka jylla ha ka sngi nyngkong ba la sdang ia ka lockdown kata ha ka 1 tarik u Jymmang 2021 kiba ia la ia mih beit na la iing la sem khlem ka jingsalia bad khlem ki car pass kiba biang ha kaba ki la don ruh katto katne ngut ki briew kiba la pyndonkam da ki car pass kiba la rim bad ki don ruh pat kiba la shu ai daw da kumne kumtei tang ban lait na ka jingshah bat ha ki pulit bad ha ki magistrate, kumta na ka liang ka Deputy Commissioner jong ka East Khasi Hills District ka la rai ban pynap noh da ka kuna ia kino kino ki briew ki bym pynbiang ia ki car pass naduh ka sngi nyngkong kata naduh ka 3 tarik u Jymmang 2021 bad ha kane ka sngi ki la don katto katne ki kali kiba la shah daiñ kuna kumba 1000 tyngka ha Mawlai Mawiong bad ha Polo na ka daw ka jingbym biang ki car pass.