BALEI IA NGA

S.K.N

[ba bteng] Haba ka step ka la pei baroh arngut shi Kmie shi khun ki la iakhie ym slem ruh ka Niakha ka la wan mih hi shaduh iing ban leit noh sha Thanat.

“Ani i Niakha phi la wan…!” La kren kyndit ka Rida
“Hooid kein khun, nga ba nga shait mlien ban khie dang step nga sngew kumba la sngi palat toi…” La phai ktien ka Niakha
Kumta namar ba kim pat ih ja ih jyntah, ka Rida ka la nang pynkhreh noh shuwa da ka sha ia la ka Niakha bad ia la ka Kmie ba kin ia dih.
“Niakha ngin leit katno baje?” la kylli ka Kmie ka Rida
“Hangto ki la thoh por 11 baje tangba shuwa ka por ngi la dei ban leit kein…” La phai ktien ka Niakha.

“O to ka biang dang kylluid ka por ..” La ong ka Kmie Rida
“Dang biang bha ta ka daw nga wan noh dang kloi…” La ong pat ka Niakha
“Ka bam ka dih ngin leh kumno Niakha ?” La kylli pat sa ka Rida
“Lada la ih ngin bam shuwa nangne ruh biang hi… Lada ym pat lap ba ih pat ngin bam sha dukan ruh ym lei lei…” La jubab ka Niakha
Kumta ka Rida ba ka la sngewthuh kumta, ka la pynstet wut ban shet ha kajuh ka por bad Stove bad Shawla ha ka Stove ka shet jyntah ha Shawla ka shet Ja. Da ka jingleh kloi ka Rida kumne ki sa ioh por ban bamja na iing shwa ban leit sha Thanat.
Haba la poi ha Thanat u Heh pulit ba peit ia ka Thanat u la khot ia i Kong Maya (Kmie Rida) ban rung shapoh ka kamra jong u. Hangne la sdang ka jingtohkit ia baroh khoit naduh ba sdang ka jingjia haduh ban poi kaba kut ba la lap ia ka Rida ba ka armet. Bun ki jingkylli ki ba eh ba eh, kiba ka Kmie ka Rida kam lah shuh ban jubab shai; hynrei ka shu pynkut da kaba sdang ban tei pop sa ia la ka Khun (Rida) ba kam iathuh shai.
Ka jingtohkit ka la neh ar kynta bad ia ka jingjubab jong ka Kmie baroh la buh jingthoh da ki pulit. Hadien kata la phah mih ia ka nangta bad la phah ap shabar shiphang.

“Nia ade jingslem haduh katto katto… Don mano mano hangto? La kylli ka Niakha kaba nang ap shabar
“Ani ko Niakha, ngam sngew lah jubab shuh ki jingkylli jingtohkit don ki ba eh ba eh bha ruh. Don uto u heh pulit bad ar ngut kiwei pat kiba nang buh jingthoh…” La iathuh ka Kmie Rida
“Kata kein Nia kaba eh, shisien ba la poi pulit, ngin hab ban wad Nongiasaid lem noh” la pynpaw ka Niakha
“Ni tip shuh Niakha, nangno kein yn ioh lak ioh putit kat ban poi uta u pud…” La pynpaw ka Kmie Rida
“Wat khuslai ia kata ngin iarap lang ma ngi ruh…” La ong ka Niakha
“Peit mynta pat tip sa ban leh aiu u phah ap…” La kren bynniaw ka Kmie Rida
“Tip shuh Nia… Ni kaba jynjar kumne kein tang shu dei kam bad pulit…” La bynrap ktien ka Niakha
Hadien shiphang ba ki ap hangta, la wan ai ha ka Kmie Rida ia ka envelop bad la bthah ba kan pule pat sha iing. Uta uba wanrah u la bthah ruh ia ki ba ki lah ban leit phai noh sha iing.
Kumta bran ki leit phai noh sha iing. Ha ka jingshisha ka Niakha ka nang pyrkhat ban leit shong dukan hadien ba la wanphai na Thanat; hynrei tang namar kata ka shithi, ka la hab ban leit phai biang sha Jaiaw shyiap sha iing ka Rida.
Marsien poi ha iing, ki la ia pule ia ka shithi bad ki shem ba la phah wan sa ia ka Rida kaba dei ka nongshah leh jubor ban tohkit ia ka namar ka jingbym shai bha ka sabut na ka nongujor.
Marsien ioh sngew ia kata ka Rida ka la shu kylli kynsan
“Lano Niakha…?”
“La shi sngi…” La jubab ka Niakha [yn dang bteng]