Nongpoh: Ki nongialam ka HYC Umsning Circle, hynne ka sngi ki la leit ban kynduh ia u Director ka A&H Veterinary bad phah ruh da ka dorkhas sha u, kata ban pynpaw ia ka jingpyrshah, halor ka jingthmu da katei ka tnat ban pynkynriah ia ka Zonal Feed Mill na shnong Lumnongrim Dewlieh sha Kyrdemkulai.
Ha ka Dorkhas kaba ki la phah sha u Director ka A&H Veterinary, kitei ki HYC na Umsning, kiba kynthup ia u Samla Donkupar JB Wriang, Vice President ka HYC Umsning Circle bad u Ruben Lyngdoh, ki la pynpaw ba ka nongrim kaba la pynlong ia ki ba kin pyrshah, halor katei ka jingthmu ban pynkynriah sha kawei ka jaka, ka dei namar ba ia katei ka Zonal Feed Mill kaba la don lypa ha katei ka shnong, ka la ai jingmyntoi shibun halor ka iohkam iohjam ki briew ha katei ka shnong. Hynrei mynta ba la thmu ban pynkynriah sha kawei pat ka jaka, kan sa wanrah ia ka jingduhnong kaba khraw ia ki paidbah ha katei ka shnong.
Nalorkata, ki la pynpaw ruh ba katei ka Zonal Feed Mill kaba la don lypa hapoh ka shnong Lumnongrim, ka dei kaba don ha jaka ba pdeng ka thain Umsning, kata haduh ka surokbah National Highway, kaba long ka jingsuk ia ki nongleit nongwan kiba trei hapoh katei ka jaka, hynrei mynta pat haba la thmu ban rah noh shawei, ka sa long ka jingjynjar kaba khraw eh ia ki nongtrei.
Ki la pynpaw ruh, ba katei ka jaka kaba la don lypa katei ka Feed mill, ka dei ka jaka ka heh bad kaba biang na ka bynta ban nangpynheh biang ia ka, hynrei ki nongpeit jong katei ka tnat, kim shym la pyndonkam ia ka ha kata ka rukom, na ka bynta ban wanrah jingmyntoi ia ka tnat hi baroh kawei.
Ka seng, namarkata ka kyntu ia ki bor pyniaid jong katei ka tnat, ba ki dei ban pynneh ia katei ka Feed Mill ha katei hi kajuh ka jaka bad ki dei ban nangpynheh, pynbiang ia ki rukom treikam ha katei hi ka jaka kaba la don lypa bad lada ki bor katei ka tnat, kin rah jubor sha kawei pat ka jaka, na ka liang ka seng kam banse ban shim pat da ki lynti kiba kham tyngeh.
Phi don ban ong eiei?