Thylli 3 ki shuki ka ARPA; U bah Pyniaid sha ka shuki EM

Shillong,
24 Rymphang:
Naduh ba u bah Pyniaid S Syiem u la risain noh na ka kam Deputy Chairman, katei ka shuki ka la shu sah thylli haduh mynta bad ka ARPA haduh kine ki sngi kam pat lah ban pyndap ia ka. Mynta pat sa ar tylli ki shuki ha KHADC ki la thylli noh bad katei ka la jia hadien ba ar ngut ki EM ka kong Grace Mary Kharpuri bad u bah Process T Sawkmie ki la risain noh na ka kam EM jong ki.
Haba wad jingtip iano u bah Adelbert Nongrum un pyndap ia kitei ki ar tylli ki shuki EM, ki lad khubor ki la iathuh ba ka kyrteng u bah Pyniaid S Syiem ka dei kaba hakhmat tam ban pyndap ia katei ka shuki, katba ia kawei pat lah ban pyndap noh da u MDC ka KHNAM u bah James Ban Basaiawmoit, namar ba kumba long mynta ka KHNAM ka la duh noh ia kawei ka bhah EM, namar ka jingrisain noh u bah Sawkmie na katei ka seng.
Kumba ka long mynta ka HSPDP kaba don 6 ngut ki MDC, lai ngut na ka ki la ioh EM bad kitei ki long u bah K.P Pangniang, bah LG Nongsiej bad u bah Morningstar Mawsor, katba kawei pat ka dei ka shongknor ka kong Teilinia Thangkhiew, ki bym don ha ka shuki mynta ki dei u bah Ardent M Basaiawmoit bad u bah Pyniaid S syiem, katba ka UDP pat kaba don 6 ngut ki MDC ka la ioh saw ngut ki EM u bah Teinwell Dkhar, u bah Donkupar Sumer, u bah Hadrian Lyngdoh, bad ka kong Rona Khymdeit, kiba sah ki long u bah Metbah bad u bah Brolding Nongsiej. Na ka liang ka KHNAM mynshuwa ka don lai ngut ki EM, hynrei na ka jingrisain noh u bah Sawkmie ka sah noh sa tang ar-ngut bad uba lait mynta na katei ka seng u dei u bah James Ban Basaiawmoit.
Katba ha kawei pat ka khubor, ki lad khubor ki la iathuh ba haduh mynta ka kong Grace Mary Kharpuri ka dang phah tang ka shithi risain na ka kam EM, ym kum ka jinglong dkhot na ka ARPA. Hynrei haba ia kren bad ki nongthohkhubor ka kong Grace bad u bah Process ki la pyntip ba ki risain noh na ka jinglong dkhot na ka ARPA ruh.