Na U DC, dawa jingdonkam ka BJP

Shillong,
24 Rymphang:  
Ka Bharatiya Janata Party (BJP) South West Khasi Hills District ka la phah dorkhas sha ka Deputy Commissioner, South West Khasi Hills District, Mawkyrwat ha ka 18 tarik mynta u bnai ban kyrpad ba ka sorkar kan buh noh ia ki Nurse bad doktor bad ki nongtrei ha Wahkaji bad Khonjoy PHC.
Ha ka kyrwoh ba la pyllait da u Bah Reston Myrthong, President bad Bah SS Lyngdoh, General Secretary, ka seng ka la ong ba donkam ban shna noh ia ka surok ha ka thaiñ Warsan Lyngdoh kaba don 18 tylli ki shnong bad ka thaiñ Phlangmawprah bad Nongmluh kaba don 6 tylli ki shnong ki bym don surok ha kine ki jaka. la kyrpad ban kyntu ia u Inspector of School bad ka ophis jong u ban peit bad kyntiew ia ki school ha kylleng ki shnong jong ka South West Khasi Hills District khamtam ka Ranikor constituency.
Ka seng ka kyrpad ban buh noh ia ka jaka pule Engineer/Polytechnic na ka bynta ki khynnah jong ka District ha kaba kim ioh lad ban leit pule shaduh Shillong bad kiwei de ki jaka. Ka seng ka pynpaw ba ka kwah ban don noh ka Nabodaya School hapoh ka District ban plie lad ia ki khynnah kiba duk.
La pyntip ruh ba ka thaiñ ka donkam ia ka ophis u Superintendent of Tax, ka State Bank of India ha Umdohlun. Ban buh Out Post ha Umdohlun namar ka jingjngai na Mawkyrwat ka long 50 km bad na Ranikor ha Umdohlun ka long 40 km na ka bynta ban pynsuk ia ki paidbah.