KA KHUBOR CHRISTIAN HOME SUNDAY

THEME: “KI ÏING KHRISTAN KUM KI JINGIWBIH U KHRIST”

NONGRIM: 2 KORINT 2:15.

🛐|Da U Mr. M.P Mawkon,
Balang Presbyterian Nongjri, Sohra Presbytery|🛐

Ka Sngi U Trai kaba nyngkong jong u bnai May la ju rakhe ia ka kum ka CHRISTIAN HOME SUNDAY. Bad ha kane ka jingrakhe ki ju don bad buh ruh da ka Theme. Bad ka theme jong kane ka snem mynta ka dei, “KI ÏING KHRISTAN KUM KI JINGIWBIH U KHRIST”. Bad haba kum kane ka por nga shim ia ka kabu ban ai khublei ia phi baroh kiba ioh ban pule ia kane ka jingiatei iasyllok “KA CHRISTIAN HOME SUNDAY KABA DAP JINGKYRMEN IA BAROH BAD TO U BLEI UN IAI DON RYNGKAT BAD NGI BAROH KI LONGÏING LONGSEM KHRISTAN BA NGIN IAI LONG KI JINGIWBIH U KHRIST HA KANE KA PYRTHEI KABA DAP DA KI JINGSMA BA PYUT PLAK JONG KA POP BAD KA JINGIAP”.

Kaei kane ka Christian Home Sunday?
Ka Christian Home Sunday ka dei ka Sunday ne ka Sngi U Trai jong baroh shityllup ki ÏING KHRISTAN.

Khyndiat to ngin ia peit ia ka jingbatai, Kaei kane ka CHRISTIAN HOME SUNDAY? Ki don artylli ki bynta hangne, Ka Christian Home bad Sunday.

Ka Christian Home kat kum ka jingbatai ha ka ktien Phareng (English) ka ong kumne, “A Christian Home is one where the whole family is bound together by the love of God in accordance. It is a family where Jesus Christ is seen as The Head of the family. It is a family that live their lives according to the scripture. In Christian Home Godly children are been raised”. Bad da ka ktien khasi ka mut “Ka Ïing Khristan ka dei ka Ïing kaba baroh shi ïing ki ia long shitylli da ka jingieid jong U Blei. Ka dei ka longïing longsem kaba U Trai Jisu Khrist u long U Khlieh jong ka Ïing. Ka dei ka longïing longsem kaba im ka jingim kaba ia dei kat kum ka Ktien U Blei. Ha kata ka Ïing Khristan Ki khun jong U Blei la pynmih na ka”.

Nangta ka ktien Sunday ka dei ka kyntien kaba ngi ju ia tip bha ia ka kaba mut KA SNGI U TRAI ha kaba kum kiba ngeit ngi ju pynlong ia ka jingiaseng lang shisien ha ka shi taiew hadien jong kiwei ki sngi kiba ngi pyndep ia ki kam ha ka jingim kaba kynja doh hangne ha pyrthei.

To mynta ngin ia phai noh sha kane ka Theme jong kane ka CHRISTIAN HOME SUNDAY ne ka Sngi U Trai kaba kyrpang na ka bynta ki longïing longsem khristan. Bad ka theme jong mynta u snem ka ong, “KI ÏING KHRISTAN KUM KI JINGIWBIH U KHRIST” ia kaba la seng nongrim na ka 2 Ki Korint 2:15 ki ktien kiba ong kumne, “Naba ngi long ki jingiwbih U Khrist ia U Blei ha kita ia kiba la pynim bad ha kita kiba da jot noh”.

Ngi kynmaw ha kaba mynnyngkong eh U Blei u la thaw ia U Adam bad ka Im, bad u la buh ia ki ha ka kper Eden kaba dap da ki jingthung bad ki syntiew ba bunjait kiba pynmih ia ki jingiwbih jong ki. Bad kata ka kper kaba ki im ka dap da ka Jingiwbih suhsieng kaba sngewbang. Bad U Blei u la sngewbha eh ban iohi ia ki ha kaba u la ai sngewbha ha ki briew ia ki 5 tylli ki jinglong kyrpang (sense). Ka ktien jong U Blei ha ka Bible ki iathuh ia ngi ia ka jingiajan ka jong ngi Bad U Trai Jisu Khrist uba la wan long briew sha ka pyrthei. U Trai Jisu Khrist ruh u don ia ka longïing longsem ha ka jingwan sha kane ka Pyrthei. Bad u Jisu Khrist ruh u don lang ia kine ki jinglong kum U Blei uba wan ha ka jinglong briew. Kumta ngi ruh ngi don ia ka jingiadei ba jan bad la u jong U Kynrad. Kum ngi U Trai Jisu Khrist u ju bang ban bam jingbam bad dih ia ki jingdih, U iohsngew ia ki ki sur ka miet. Ngi ruh ngi donkam ia ki ba ha ïing ha sem, kumjuh U Trai Jisu u don ka longing longsem haba u wan long briew sha ka pyrthei. Ngi kum ki briew ngi don san tylli ki jinglong kyrpang kata ka jingiohi, ka jingiohsngew, ka jingmad, ka jingtba bad ka bor jingiw. Hynrei kaei kaba ngin ia kren mynta ka dei ka Jingiw, ka jait jingiw aiu? Ka jingiwbih ka jong U Khrist ha ngi ki Khristan. Ngi kum kiba ngeit baroh ngi don ia kane ka jingiwbih jong U Khrist. Bad la pyndap ia ngi ia kane ka jingiwbih jong U Khrist uba long U Tynrai jong kata ka jingiwbih jong ngi. Ainguh ia u Blei uba la pynlah ia ngi bad uba PYNRISA ia ngi lyngba U Trai Jisu Khrist uba la pynpaw ia ka jingiwbih ka jingtip ka jong u da ngi ha ka jaka baroh. Bad ngi la ioh ia ka nam kum KA JINGIWBIH U KHRIST IA U BLEI ha kita kiba la pynim bad ha kita kiba da jot noh ruh. Bad lyngba jong U Mynsiem bakhuid jong U Blei uba dang iai sah bad ngi ngi long ki jingiwbih U Khrist hangno hangno ba ngi don bad ha kano kano ka por ruh. Lada phin wad bha ia kane ka kyntien “KA JINGIW BA IWBIH” kan don beit kawei ka kyntien ba bud ia kane ka kyntien. Bad kata ka kyntien ka dei U TRAI. Kaba mut KA JINGIW BA IWBIH JONG U TRAI, bad kine ki ia snoh shaphang ka JINGKÑIA AINGUH THANG SHA U BLEI KABA U DA PDIANG HUN. Bad kine ki Jingkñia ki long kum ki JINGIW BA IWBIH HA U BLEI.

“Hynrei ia ki snier bad ia ki kjat jong u un sait ha ka um: bad u lyngdoh un thang ia kata baroh halor ka duwan, ia ka ban long ka jingkñia ainguh thang, kaba long ka jingkñia da ka ding jong ka jingiw baiwbih ha U Trai” – (Lebitekos 1:9). “To hukum ia ki khun Israel, to ong ruh ia ki, Ia ka jingainguh jong nga, ia ka jingbam jong nga ia ki jingkñia kiba da ka ding, ban long ka jingiw baiwbih ha nga, to phin sumar ban ainguh ha nga ha ka aiom ia kaba la buh” – (Jingkheiñ 28:2).

Bad ngi tip ba U Trai jong ngi U Jisu Khrist da lade hi u la wan ban aiti kum KA JINGKÑIA BA IM BAD BA IWBIH HA U BLEI bad lyngba ka SNAM jong U TRAI JISU KHRIST la bteng pat sa shisien ia KA JINGIADEI jong ngi bad U BLEI.U Trai Jisu Khrist u la aiti ia lade kum ka jingkñia ba im bad ba iwbih ban shah iap da ka JINGIEID BYM LAH BATAI ia NGI. BAD da kaba u aiti ban shah iap ia lade u la kylla long U Nongaipateng ia kata ka JINGIWBIH KA JONG U ha ngi baroh kiba ngeit bad pdiang ia U. Kumjuh kum KI ÏING BAD RYMPEI KHRISTAN KIBA LA PYNLONG DA NGI IWEI PA IWEI BAROH HA LA KI ÏING LA PYNDAP IA KATA KA JINGIWBIH JONG U KHRIST HA NGI HADIEN BA LA PYNLWET IA KA MET KA JONG U, HADIEN BA LA SYMPAT DA KI SHABUK NAR IA KA MET JONG U, HADIEN BA LA SUM IA KA KRUNG KA JONG U BAD HADIEN BA LA PYNPHONG PANSNGIAT SHIAH IA U KA SNAM BAROH KA LA MIH BAD IA KA MET JONG U LA KHÑIOT NOH BAN PYNMIH IA KA SNAM KABA LONG KA JINGIM BA IWBIH HA U BLEI BA KAN IOH BAN TAP BAD PYNDAP HA KA JINGIM JONG NGI LYNGBA JONG U, UBA LONG U TYNRAI KA JINGIWBIH JONG NGI.

Kum ki Rympei Ïing Khristan ngi ai nguh eh ia U Blei lyngba U Trai Jisu Khrist u khun ba marwei jong U, u la thaw ka lad ban pyllait im ia ngi ki briew. Bad da ka jingshahiap bad lyngba ka snam U Khun jong u la pynim pat ia ngi da ka jingngeit ha U. Kumno kum ki Longïing ngi lah ban long ki Jingiwbih jong U khrist ha kane ka Pyrthei kaba jot kaba rem bad kaba sma pyut da ki pop bad ki jingjyrsieh jong ka? Ka nuksa kaba ngi lah ban ioh kumno ban bat skhem bad ban iai long , KI ÏING KHRISTAN KUM KI JINGIWBIH U KHRIST ka long tang ban peit ia ka Nuksa na U TYNRAI jong ka JINGIWBIH U TRAI uba long U JISU KHRIST. Kita ki long kumne harum:-

I. KA JINGIEID JONG U: Ngi kynmaw ba U Trai Jisu Khrist da kawei ka JINGTHMU u la wan sha kane ka Pyrthei bad kata ka long ban Pynim ia ka. Ka Pyrthei ka dei kaba dap da ka pop bad ka bainong ka jong ka ka long ka jingiap. Te kumta U Blei u sngewthuh ba ym don lad da kumwei pat ban pyllait ia U Khun bynriew. Bad tang kawei ka Lad kata ka long ban phah ia la u khun sha ka Pyrthei ban siew dep ia ki ram jong ka pop na ka jingiap. Kumta U Trai Jisu ruh u la wan sha kane ka Pyrthei tang kawei kata ka long BAN PYNIM IA KA, kum ka kyrteng jong U hi (JISU). Bad kane ka dei namar ka Jingieid Bah ka jong U Blei bad U Trai jong ngi U Jisu Khrist. Bad haba U wan ha kane ka Pyrthei u wan ban hikai ia ka jingieid namar ia lade U dei u Tynrai jong ka Jingieid. Ngi kynmaw bada ka jingieid bah jong U kpa jong U uba long U Blei lyngba ka jingieid bah jong u ia ngi, u iai shah haduh ban poi ha U Lum Golgotha. Wat halor ka diengphna U dang ong ia la u Kpa, To Map ia ki naba kim tip kaei ki leh. Kumta to ai ba kane ka jingiied kan long hapdeng jong ngi, Ka jingieid ia U Blei, ka jingieid ia U Trai Jisu bad ia la ki para briew baroh.

Ka Jingkylli ka long, HATO KANE KA JINGIEID KA DON NE EM HAPDENG JONG NGI? HATO KANE KA JINGIEID KA SYNSHAR NE EM IA KI LONGÏING LONGSEM JONG NGI? HATO KANE KA JINGIEID KA DON NE EM IA LA U TRAI JISU KHRIST UBA LA WAN BAN SHAH NA BYNTA JONG NGI BAD UBA DANG IAI IASAID NA BYNTA JONG NGI HAKHMAT U KPA JONG U UBA HA BNENG? Ka Jubab ka long shimet shimet ha ngi baroh.

II. KA JINGLEN LADE BAD AITI LUT JONG U: Bad lyngba kane KA JINGIEID BAH u la wan sha kane ka pyrthei ban PYNIM ia ka. Bad lyngba kane ka JINGIEID Bah u la LEN LADE bad AITI LUT ia lade ruh wat ban ai ia la ka jingim na ka BYNTA KA JONG PHI BAD JONG NGA. U la wan long briew ha ka pyrthei na ka khet Blei tang ban pynim ia nga. Ym don shuh kum U Trai Jisu Khrist uba wan ban LEN LADE bad AITI ia la ka jingim na ka bynta ban pynim ia ngi.

Haduh katno ngi la long kiba Len Lade bad Aiti lut na Bynta U Trai Jisu Khrist bad ia U TRAI UBA U BLEI BADONBOR BAROH? Ka jubab ka long shimet shimet ha ngi baroh.

III. KA JINGMAPEI JONG U: Ka Jingmapei ka dei kawei kaba U Trai jong ngi U Jisu Khrist u don ban leh wat ha shuwa ba un aiti ia la ka mynsiem sha U kpa. Halor ka diengphna kane ka JINGMAPEI ka bud ryngkhi ia U. Ngi kynmaw ba ha ka diengphna bad ki arngut ki dakaid, une U Trai Jisu Khrist u dang pyndep ia ka mission jong kane ka JINGMAPEI da kaba U MAP NOH ia uwei na ki DAKAID. Ymtang ba U Map hangta hangta hi hynrei u Promise ruh wat ba un don ha ka PARADAIS ha kata ka sngi hi. Nga ainguh ia U Blei uba la phah ia u khun jong u U Jisu Khrist uba wan ban MAP EI ia ki pop jong nga da ka jingngeit ha U. Kumba U Map ia une u dakaid ha ka diengphna ha ka kynta bad ka minit ba khatduh jong ka jingim jong u, UN MAP RUH IA NGA.

Ka Jingkylli mynta ia nga bad ia ngi baroh ka long, HATO KANE KA JINGMAP KA DON NE EM HAPDENG JONG NGI? HATO KANE KA JINGMAP KA DON NE EM HA ÏING HA SEM JONG NGI? HATO KANE KA JINGMAP KA DON NE EM HA KA BALANG JONG NGI? HATO KANE KA JINGMAP KA DON NE EM HA KA SHNONG KA JONG NGI? BAD KHATDUH HATO KANE KA JINGMAP KA DON NE EM HA NGI SHIMET SHIMET? KA JUBAB KA DEI KA JONG NGI HA LADE MARMET BAD LA U TRAI JONG NGI.

IV. KA JINGIM KABA DAP DA KI JINGDUWAI: Ngi kynmaw ba U Trai jong ngi U jisu Khrist ha ka jingim kum U khun jong U Blei hynrei ym ju man thait ban dem ha ka jingduwai ha kano kano ka khyllipmat ha la u jong u Kpa uba long U Blei badonbor baroh. Ngi kynmaw ha ka Bible shaphang U Trai Jisu Khrist ha ka dur ka Jinglong Blei, hynrei u dang wad ia ka khmat U Blei lyngba KA JINGDUWAI, kaba long ruh ka Nuksa ia nga bad ia ngi baroh ki bangeit. U Trai Jisu

1. U la dem ha ka jingduwai ha ka por Janmied (Mathaios 14:23).
2. Ha ka por mynstep ruh (Markos 1:35).
3. Baroh Shimiet ruh ( Lukas 6:12),
4. Nangta ha ka por kaba eh than jong ka jingim jong u ruh shuwa ba un ia kynduh ia ka Jingiap (Hebru 5:7).
5. Bad ha ka jingjaw ummat, jingpisa mynsiem bad Jingkhuslai ha ka Kper Gethsemane (Mathaios 26:36).

Hato ma ngi ngi long ne em kiba IM HA KA JINGDUWAI kum U TRAI JONG NGI U JISU KHRIST? Ne ka jingduwai ka long tang ha ka por ba ngi donkam ne ia U Blei? KUM KI RYMPEI ÏING KHRISTAN HATO NGI LONG NE EM KA ING JINGDUWAI? Ka Jubab nga ieh ha phi ki paralok shimet shimet ban ia jubab.

V. KA JINGPYNKHIAH JONG U: Kawei pat ka nuksa na U Trai Jisu Khrist ia ngi ban long ki Jingiwbih jong U ka long ka jingpynkhiah. Ngi kynmaw ba U Trai Jisu ha ka por ba u dang don ha ka Pyrthei u ju leh ki kambah jong ka jingpynkhiah ia ki briew baroh. Ngi ruh kum kiba ngeit baroh ngi don bynta lang ha kane ka jingshakri ha kane ka jingpynkhiah, ngi don ia ka Hospital ka jong ngi kaba ngi ia snoh kti lang baroh ban ia don bynta. Haoid ngim dei lut ki Doctor, ki nurses ne ki staff ha kane ka jingshakri hynrei lyngba ka jingai ngi la ia noh kum ka ïing ka sem khristan. Bad sa kaei ba ngi don ban ia shim bynta ha kane ka jingpynkhiah ka long ka jingduwai ia kiba pang kiba shitom. Ngi don ki Hospital jong ngi kiba ngeit khristan kum Ka Robert Hosptial, Ka Nasareth Hospital bad kawei pat ka Hospital uwei u shakri jong U Blei (uba U Blei u la shim noh ha lade) uba la buh ia ka Bethany Hospital da kawei ka JINGTHMU ban Shakri ia kiba donkam JINGPYNKHIAH. Ngi don la ka jong ka bynta ha kane ka jingshakri kum ki longïing longsem khristan. Ngi lah ban dei ki Doctor, ki Nurses, Ki Lab Technician, kiwei pat ki Health workers ha la i jong i kam ban ia shakri la rit ne khraw.

To kum kiba ngeit Khristan ha kane pat ka Khyllipmat mynta pat to ngin iai long KI PRAYER WARIORS BAN IAI DUWAI IA KA JINGPYNKHIAH JONG U BLEI IA LA KA RI KHASI JAIÑTIA, KA JYLLA MEGHALAYA JONG NGI, IA KA RI JONG NGI BAD IA KA PYRTHEI BAROH KAWEI PYRSHAH IA UNE U KHÑIANG CORONA VIRUS NE COVID 19.

VI. KA JINGHIKAI KA JONG U IA KA JINGSHISHA KA KTIEN U BLEI: U Trai Jisu Khrist ha kane ka pyrthei ha ka por ba u don u ju hikai ruh ia ka jingshisha jong ktien U Blei. U da hikai ruh da ki pharshi ha ka por ba u hikai. Ki synran jong U Trai Jisu Khrist ki dei kiba ioh bha ia ka jinghikai jong U. Bad ki sa kylla long ki SHAKRI kiba khraw ia ka kyrteng jong U. Ngi kynmaw ha ka lynti sha Emmaus, U Trai Jisu Khrist u la hikai ia ki arngut ki synran shaphang ka jingshisha ka ktien U Blei naduh ki Nongiathuhlypa jong ka Old testament, ki Salm bad haduh ka jinghikai shaphang ka jingwan jong U, ka jingshahiap bad ka jingmihpat ruh. La iathuh ba la plie ia ki khmat jong ki bad la pynpluh ruh ia ka dohnud ka jong ki. U Trai Jisu u kham ban bha ban kren ia ka jingiap, ia ka jingmihpat jong u man la ka por (Markos 8:31; 9:31; 10:33–34 ), Hynrei wat la katta ruh ki synran jong u kim shym sngewthuh. Hadien ka jingmihpat jong U Trai Jisu, Ngi iohi ba ki Synran bad ki Apostol, ki khristan jong kato ka por bad mynta ruh ngi dang ia pyndep ia kane ka Jingbthah jong U Trai Jisu Khrist ban iathuh bad ialap ia kane ka jingshisha.

VII. KA JINGIADEI KABA JAN JONG U BAD U BLEI: Ngi iohi ha ka Bible ia ka jingiadei kaba jan bha hapdeng jong U Blei bad u khun jong u u Jisu Khrist. Ngi kynmaw ba U Trai Jisu Khrist u la ong ia kine ki kyntien, “Mem ngeit ba nga nga long ha u Kpa, bad uta U Kpa ha nga? Kita ki ktien ia kiba nga kren ma nga ha phi, ngam kren na lade; hynrei uta U Kpa uba shong neh ha nga, u hi u leh ia kijingleh jong U” (Ioannis 14:10). Nangta u Jisu u pynkynmaw kumne ruh, “Nga uba long kata ka lynti, bad ka jingshisha bad ka jingim de: ym don uba wan ha U Kpa, hynrei tang da nga” (Ioannis 14:6). Nangta U Paul ha ka shithi kaba nyngkong sha U Timothi, u ong kumne, “Namar don uwei U Blei, bad uwei u ksiang ruh hapdeng U Blei bad ki briew, U Khrist Jisu uba u hi ruh u briew”. Sa shisien biang U Trai Jisu u pynkynmaw kumne, “Lada ngan pyndonburom ia lade, ka burom jong nga kam long eiei ruh em,U Kpa jong nga u long uba pyndonburom ia nga; ia uba phi phi ong ba u long U Blei jong phi” (Ioannis 8:54). Shibun ki jingshisha na ka Bible ngi lah ban iohi shynna ia kane ka Jingiadei kaba jan bha hapdeng U Blei bad U Jisu Khrist.

Hato kum ki Rympei Ïing Khristan ngi don ne em ka Jingiadei kaba jan bha bad U Trai Jong ngi U Jisu Khrist? Hato ngi don ne em ka jingiadei kaba jan bha bad U Blei? Ka jubab ka dei ka jong ngi ban ia puson bad jubab.

VIII. KA JINGSHANIAH KA JONG U HA U BLEI: Ka Jingshaniah jong U Trai Jisu ia kaei kaba u Kpa jong U u pyniaid la iohi shynna ia ka ha ki saw tylli ki Gospel bad ha ka New Testament hi baroh kawei. U Jisu kum U khun U da shaniah ia kaei kaba U Kpa jong U, u la plan. U wan sha ka Pyrthei ban ioh leh ia ka mon ka jong U Blei. Haoid wat la ka don ka khep ha kaba U duwai ban iasaid sha la U Kpa ban ong ba lada long kaba lah ban pyllait noh na kata ka Khuri kaba u hap ban mad hynrei U shaniah pat ha ka mon jong U Kpa jong U ym ha ka mon lade ban pyndep ia ka Mission kaba u la wan khnang. Bad da kane ka jingshaniah u la jop ia ka Jingtep bad ia ka jingiap bad la pyndonburom ia U da U Blei bad u la leit kiew pat sha la U Kpa ban shong ha ka kti kamon jong U.

IX. KA JINGLEH ISYNEI BAD UBA SNGEWISYNEI IA KI BRIEW: U Trai Jisu Khrist da ka jingisynei ngi kynmaw haba u iohi ia ki paidbah kiba iaid sakma bad kiba la saphred kum ki langbrot ki bym don ki nongsharai. Kumta ngi kynmaw ba u ong donkam ban kyrpad ia U Trai ka jingot ban phah ia ki nongtrei sha ka jingot jong u (Mathaios 9:36-38). U Jisu u da hikai, uda pynkhiah ruh ia ka jingpang ka jingkhrew baroh (Mathaios 9:35, Markos 6:34). Ngi iohi ba U trai Jisu ym tang ba u isynei hynrei u leh isynei ruh, kata ngi lap ia ka jingpynkhiah jong U ia u bapang ñiangthohlieh da ka jingsngewsynei bad u la leh isynei ia u da kaba u pynkhiah ia u. (Markos 1:41). Ngi kynmaw ruh haba u iohi ia ka jingud bad jingiam jong ka Mary bad ka Martha haba ki la duh noh ia la u para u Lasarus, U Jisu u la iam, nga mutdur ba dei da ka jingsngewsynei.

Hato ma nga bad ma phi ngi long ne em kiba sngewsynei bad kiba leh isynei ia la ki para briew? Ha kum kane ka por nga iohi ba bun ki la pyrshang ban leh ia ki kam isynei kum ki briew shimet, ne kum ka ing ne kum ka seng bad kumta ter ter.

X. KA JINGKOHNGUH KA JONG U IA LA U KPA (U BLEI): U Trai Jisu Khrist u dei u khun uba don ia ka jingkohnguh kaba haduh katta katta ia la U Kpa. U Trai Jisu u la wan khnang ban KOHNGUH ia la U KPA. Dei kata ka jingkohnguh kaba la pynlong ia U ban kiew halor ka Diengphna. Ka Jingkohnguh ka jong u ka ai ka jingkyrmen, ka jingsuk, ka jingkmen bad ka jingim kaba bymjukut. Bad jin lada U Trai Jisu um pynrit ia lade bad um kohnguh, ngin jin lada long sah ki briew kiba shah teh ha KA POP bad kiba ym don Jingkyrmen. Ngi kynmaw ba U Trai Jisu u la ong kumne, “Ka Jingbam jong nga long ba ngan ioh leh ia ka mon ka jong uta uba la phah ia nga, bad ba ngan ioh pyndep ia ka kam jong u” (Ioannis 4:34).

Mynta ka jingkylli ka long ia ngi baroh, Hato ngi long ne em kiba kohnguh ia U Trai Jisu Khrist bad ia U Blei uba donbor baroh?

XI. KA JINGPYNDEP IA KA MON U BLEI: Ngi kynmaw ia kawei na ki jingiasaid jong U Trai jisu halor ka diengphna kaba u ong kumne, , “Ko Kpa ha ki kti jong me nga aiti ia la ka Mynsiem”. U Trai Jisu u don ban iasaid ia la U Kpa ka long ba u la aiti baroh ha ka kti badonbor jong U Blei. U Jisu Khrist u la long uba pynkohnguh ia lade ha la U Kpa jong U ban pyndep ia ka mission kaba u la phah. Bad ka kyntien ba khatduh ka jong u halor ka diengphna ka dei KA JINGDUWAI sha la U Kpa. Ka jingiadei hapdeng U khun bad u Kpa ka long kaba jan haduh katta katta. Ia ka jingdei jong U Jisu bad la U Kpa jong u (U Blei) ngi lah ban iohi ha ka Gospel Ioannis kaba ong kumne, “Ma nga bad uta u Kpa ngi ia long shitylli” (Ioannis 10:30). Nangta ha ka jingiabamja miet kaba khatduh, U Jisu u la ong “Mem ngeit ba nga nga long ha U Kpa, bad uta u kpa ha nga? Kita ki ktien ia kiba nga kren ma nga ha phi, ngam kren na lade; hynrei uta U Kpa ba shong neh ha nga, u hi u leh ia ki jingleh jong u” (Ioannis 14:10). U Tra Jisu u la iathuh shuh shuh kumne, “Nga la mih noh na uta U Kpa, bad nga la wan sha ka pyrthei, pat nga iehnoh ia kata ka pyrthei, bad nga leit sha la uta U Kpa” (Ioannis 16:28). Sa kawei shuh ka kyntien kaba U Trai Jisu u la ong ka long,, “La Pyndep” (Ioannis 19:30). U Trai Jisu u la pyndep ia ka mission kaba U la wan khnang kaba U Kpa jong u u la phah ban pynim ia ka Pyrthei. Kumta u don ban ia said ia la u Kpa ba u la dep ban pyndep ia kata ka Mission kaba u Kpa u la phah, ba u Blei un ai ka jingmap bad jingpynim ei da U na ki pop baroh jong ka pyrthei.

Ka Jingkylli ia nga bad ia ngi ka long, Hato ngi pat ngi la sdang ne em ban pyndep ia kaba U Trai Jisu Khrist u la phah ia ngi shuwa ba un kiew sha bneng kaba ngi lah ban lap ha ka Gospel U Mathaios 28:19-20, “Namarkata keiñ to khie da leit noh ma phi, to da pynlong synran ia ki bynriew baroh, da pynbaptis ia ki ha ka kyrteng ka jong U Kpa, bad ka jong U Khun bad ka jong U Mynsiem Bakhuid, da hikai ia ki ban sumar ia kiei kiei baroh kat kiba nga la hukum ia phi. Ha khmih ruh nga nga long ryngkat lem bad phi ha la ka sngi, haduh kaba wai noh ka pyrthei”.

Mynta ka shong ha ngi shimet ban ia jubab ia kine ki jingkylli. Hynrei kum kiba ngeit to ngin kynmaw ia ki KULAR jong U TRAI JISU KHRIST kiba ngi iohi haneng kaba ong, “Ha khmih ruh nga nga long ryngkat lem bad phi ha la ka sngi, haduh kaba wai noh ka pyrthei”.

✝HATO PHI LONG KI JINGIWBIH JONG U KHRIST?????????✝

✝HATO KUM KI LONGÏING LONGSEM KHRISTAN NGI LONG NE EM KI JINGIWBIH JONG U KHRIST?????????✝

TO U BLEI UN KYRKHU IA NGI BAROH.