Ki khun bad ki kmie ki kpa ka juk mynta

Babu Kular Khongjirem

Ki khun ki dei ki nongkynti bad ki nongmih pateng na ki kmie ki kpa.Ka snam jong ki kmie ki kpa ka hiar pateng sha ki khun ki ksiew ter ter.Ki kmie ki kpa ki long kum ki Blei hakhmat ki khun.

Horkit! hordang! ym ju bit ban ibein,leh bein ia la ki kmie ki kpa hadien ba ki la tymmen namar dei ma ki ki nongri nongsumar naduh dangkha,ki nongpynheh- pynsan-pynrangbah bad nong pynnang pynstad haduh ba kin da ioh kam ioh jam ne nang hi la ka bylla ka kit nong ban im ka kpoh lajong bad ka ing ka sem lajong.

Ha ka jingshisha,ki khun kiba sngewthuh bad don burom kim lah siew kylliang shuh ia la ki kmie ki kpa lait tang ka jingieit bad jingburom jongki junom.Ym don lak don klur ban siew kylliang ia ki kmie ki kpa ha kane ka pyrthei. Hynrei,kaba phylla pat kalong ba kane ka juk mynta kadei ka juk kylla khongpong lut baroh.Ynda ki khun kila heh la san,ki khun kim da salia shuh bad kim niewkor shuh hi ruh ia ka dor jong ki kmie ki kpa.Ki iaid bad leh katba mon khlem sngap shuh ia ka jingsneng jingkraw bad jinghikai ki kmie ki kpa.

Don kein ki ‘khun jynrien’ kiba mih na ka doh(kmie kpa) dait bad kjit snam biang na ka doh(na la ki kmie ki kpa hi).Don ruh ki ‘khun tham’ ne khun jaitpdeh kiba shu kjit lut ia ka kamai kajih jong ki kmie ki kpa haduh ba kin da kyrduh hi khait bad wat haduh ba ka kmie tham kan iap syndon.Hynrei kiba kham ma kalong ba don ruh ki khun kiba kylla ‘khun kbeit Shapuloit’ kiba byrngem shoh byrngem dat pynban ia la ki kmie ki kpa haduh ba ki kmie ki kpa ruh ki tieng bad salia ia la ki khun ki tang shu wan sha ing. Ka ktien ki riewstad ka maham lypa ia ki khun kiba ibein bad bym salia ia la ki kmie ki kpa.Ka Phawer u Aesop ka maham ba ‘kyrdit ia ki khun kiba haram ia la ki kmie ki kpa’.Ki khun kiba saitlah ia la ki kmie ki kpa kim ju long briew ha ka jingim jongki ba ki pynsngewsih ia la ki kmie kpa ba ki dei ki Blei jongki.Lada ai mon palat ia ki khun ruh,pleng kim long.’Ki khun ioh mon kim ju long ei ei’.Hynrei,ka jingma kaba ap lypa ia ki khun lada kim nang ban kohnguh ia la ki kmie ki kpa kalong,ba ‘ ki khun tam sneng dei ki nongshun ba sniew tam jong u briew.’

Kine kilong tang katto katne eh ba ki khun kane ka juk mynta ki dei ban tip bad sngewthuh bad lada kim kyndit bynriew noh shwa ban dier ka por,kan sa poi ka por ba kin babe kylla junom la junom.