Wanrah U CEM, ka mang tyngka ba T.15 klur ka KHADC

Shillong,
23 Rymphang:
U Chief Executive Member (CEM) ka KHADC u Bah Adelbert Nongrum u la wanrah mynta ka sngi ia ka Mang Tyngka ka Council kaba T.15.40 klur na ka bynta ka 1 tarik Iaiong haduh u Jylliew ka 30 tarik mynta u snem.
Ka Executive Committee (EC) jong ka Council, kam pat lah ban wanrah ia ka mang tyngka kaba pura na ka bynta u snem 2015-16, namar ba ka District Council ka dang ap ia ka bhah na ka sorkar jylla na ka bynta u snem 2013-2014.
 ”Ka jingioh ba la kdew, ka dei u budlum jong ka Council, lait noh ka professional tax, na khaii pateng bad kiwei pat”, la ong u Bah  Nongrum.
U CEM ka KHADC u la iathuh ba ka mang tyngka kaba pura jong ka Council na ka bynta u snem 2014-2015 yn wanrah ha ka dorbar ban wan.
Ki jingai bhah ba kham kongsan ha kane ka mang  tyngka ki long na ka bynta ka Civil works and Development Department kaba long T. 7.20 klur.
Kiwei ki jingbhah ki long ka General Administration Department T.3.84klur; T.1.33 klur ia ka Forest Administration Department, T.1.08 klur ia ka Revenue and Finance Department.
Ha kane ka sngi dorbar kaba nyngkong, la wanrah ruh ia ka kaiphod jied Sirdar ka Mawsmai-Nongthymmai hapoh ka  Mawsmai-Nongthymmai Sirdarship bad ka jingjied Sirdar  ka  Synnei jong ka Synnei Sirdarship.
La wanrah ruh ia ka Khasi Hills Autonomous (Khasi Social Custom of Lineage) (First Amendment) Bill, 2015 na ka bynta ban pynkylla ia ka.