U kandidet MLA jong ka jylla Tamilnadu, U Thulam Saravanan, u don ia ka jingtyrwa kaba sngew shyrkhei sat, na bynta ki nongjied jong ka Madurai South Constituency, kaba u iakhun ha kane ka kynti, kum u kyrtong shimet.
Utei u kandidet, u tyrwa ia ka helicopter, na bynta ka Constituency, u tyrwa ban leit sha u bnai, u tyrwa ia ka kali, na bynta kawei pa kawei ka iing, u tyrwa ia 100 song ka ksiar bad u kular ban buh da u thah, ban pyn pyngngad ia ki paidbah jong ka Constituency.
Bun ki ban kren bein, halor kitei ki jing kular, hynrei haduh mynta, lah ban ong, ba kiba jop elekshon, dei kiba shu kular bad ki jing kular kiba thok suda bad kawei na kitei, ka dei ka jing kular, ban sei madan ia ka pisa thok bad ban thep ia T.15hajar sha kawei pa kawei ka account jong u nong India, kaba la kular da U Narendra Modi, nong ialam ka BJP ha ka elekshon 2014.
Ha ka jylla jongngi, ki dang kynmaw bha, ia ki jing kular elekshon ka NPP, ka BJP, ka UDP, PDF, kiba don mynta ha ka sorkar bad kita ki long ban pyllait hapoh hynriew bnai, ia ka jingkhang dewiong, ban pynbeit noh mardor ia u pud u sam bad ban kyntiew ia ka rep ka riang.
Na ki jing kular elekshon jong utei u kyrtong, ngi hap ban wan rah, ia ki jingkhein kiba lam iadei bad kawei na ki jingkular jongu, ka long ban ai kawei ka kali sha kito kiba thep ia u bad ka jing shisha, ka long ba ha kane ka elekshon, ba dang shu dep ha Tamilnadu, ka tnat pyniaid elekshon, ka ioh kurup T.446klur, ka pisa tuh, kaba thmu ban pynbieit ia ki nongthep vote bad na katei ka pisa ki politician lada pyn kylla sha ka dor kali, khlem pep, kin mih da ki lak tylli ki kali bad u paidlang katei ka jylla, ula ia ioh pyndonkam sahuh.
Ka wan sa kawei pat ka mat bad kata, ka long ba uno uno U MLA, uba la jop elekshon shisien; ka jingkiew spah jongu, kan long kaba shyrkhei bad ngin nym ia tare bun than; hynrei ki jingkhein, ki pyni ba U Sarbananda Sonowal, myntri rangbah ka Assam, u kiew spah haduh 71 percent, tang hapdeng ka elekshon 2016 haduh 2021, lane na ka T.1.85 klur sha ka T.3.17klur (tang ka pisa) bad lada katei ka pisa, yn ai sha ki paidbah, kumta, kin don ki ban ia ioh mar T.20hajar shi khlieh briew bad ka pyni, ba ka jing kular ai ei kali, u kandidet ha Tamil Nadu, ka dei kaba ula da khein bha bad don ia ki jing shisha.
Phi don ban ong eiei?