Kaei ka jingdonkam, ban pynlong jing ia khih, ong U Mukul

Shillong,
20 Rymphang:
U Myntri Rangbah ka jylla u Dr Mukul Sang ma u la ong ba ki sengbha lang ka rilum Jaintia Hills kiba dawa ban sei madan ia ka kaiphod siat iap Mookhep ki dei ban weng noh ia ka jingiakhih jongki.
“Kaei ka jingdon kam ban pynlong jingia khih haba ka sorkar jylla ka long kaba shai haba iadei bad kane ka kam”, la ong u Dr Sangma haba kren sha ki nongthoh khubor mynta ka sngi Thohdieng.
Katkum ka jingong u Myntri Rangbah, ka tnad sorkar kaba dei leh ia kane ka kam, ka dang eksamin ia ka kaiphod.
“Nga la bthah ia ki ophisar kiba dei ia kane ka kam ban pyndep wut wut ia ka kaiphod”, la ong u Myntri Rangbah.
U la ong ba ka sorkar jylla kan shim ia ka rai ba kut hadien ba la ioh ia ka jingai jingmut katkum ka jinglap jong ka jingtohkit.
U Dr Sangma u la ong ba ka kynhun myntri kan sa bishar la ka kaiphod kan long kaba hun ne em hadien ba la iohi ia ka.
 ”Ngi lah ban thung da kawei ka jingtohkit lada ngim hun ia kaiphod ba la ioh na ka jingtohkit kaba la dep”, la ong u Myntri Rangah bad bynrap ba ka sorkar jylla kan shim kam iano iano ba donkti katkum ka jinglap ka komiti tohkit.
U la ong ba ka sorkar kan sa sei madan ia ka kaiphod hadien ba la ioh ia ka.
Shwa ia kane, ki san tylli ki sengbhalang na Jaintia Hills ki la khot pynlong ia ka pakhang surok miet naduh ka 25 tarik khlem pud namar ba ka sorkar kam shym la jubab ia ka jingai ppor jongki ban sei madan ia ka kaiphod siat iap ha Mookhep mynshem snem ha kaba ar ngut ki mynsiem briew ki la khlad.
Kine ki san seng ki kynthup ia ka Ri Jaintia Youth Federation (RJYF), Meghalaya People’s United Front (MPUF), Hynniewtrep Achik National Movement (HANM), Jaintia Students’ Movement (JSM) bad ka Hynniewtrep National Youth Front (HNYF).