Ka jingkyntu bad jingai jingmut ba kyrkieh ia ka Sorkar na ka bynta ban iakhun ia ka jingwan biang u Covid-19 ha ka sien kaba ar bad kaba kham shyrkhei

Dr. Moses Kharbithai, Assam University, Silchar.

Ha kylleng ka pyrthei khamtam eh ha ka ri India ha kine ki sngi ngi la iohi ba ka la don ka jingkiew sted jong kane ka khlam Covid-19 ha kaba mynta lei ka la kot palat lai lakh ha ka shi sngi. Kaba kham ma ka long ba baroh ki stad jingsumar ki ong ba ha kane ka sien une u Covid-19 u kham shyrkhei lai-shah ban ia u Covid-19 uba ia bit ha ka jingwan jong u kaba mynshem snem. Lyngba ki khubor ngi la iohi ruh ba ki nongialam ka Sorkar Pdeng ki shym la long da leilei ruh kiba la pynkhreh ban iakhun ia kane ka khlam.

Ha kiba bun ki jylla ka la don ka jingduna ki oxygen, ki injection, bad ki dawai dashin. Ka Sorkar Pdeng ka la sdang ban sait kti bad ban ngiat pynban sha ki sorkar jylla. Lada ki sorkar jylla kim don ia ki strategy ban ialeh pyrshah kham kloi ia une u Covid-19, ki nongshnong ha ki jylla barit bad ba duk jong ngi ki don hapdeng ka jingsyier kaba khraw shibun. Shwa ba ka jingma kan wan ban synshar bad ba ka sorkar kan shim jingeh shibun ban iakhun ia kane ka khlam, katto katne ki jingai jingmut kiba kyrkieh ia kiba la sot na ka rukom pyniaid kam na kiwei ki ri bad ki jylla kiba haduh mynta ki la long kiba kham bit kham biang ban ia kiwei, sngewdei ban tyrwa lyngba kane ka lad:

1. Ba dei ban pynkhlain bun shah ia ki awareness programme ban poi sha baroh ki thain bad ki shnong ha kaba ia dei bad u Covid-19 bad khamtam ka jingai tika.
2. Ba ki paidbah kiba la dei ban ai ia ka tika Covid-19 ki dei ban shim ia kane ka lad wut wut khlem da artatien namar ba la shem ba kito kiba la dep ai ia ka tika arsien wat lada ki lah ban ioh biang ia une u khniang jiingpang ka bor jong u ka la tlot bad ka kham suk ban ioh biang ia ka jingkoit.
3. Ba ka sorkar ka dei ban ai ei ia ka tika ia baroh ki nongshong shnong kiba la 18 snem shalor wat haba ka sorkar pdeng ka la sdang ban pynkit ia ka jinglut jingsep ban thied tika ha ki sorkar jylla namar kane ka jingai ei solonsar ia u tika wat lada ka sorkar kan hap bei tyngba hynrei kan wanrah pat ia ka jingiada salonsar bad kane kan long ka stieh kaba khraw ha kaba ka sorkar kan iada ruh na ka jinglut ksan kaba lah ban mih lada hap ban khangkhyrdep biang ia ki kam ki jam.
4. Ba ka sorkar ka dei ban pynstep laiphew shah ia ka jingai tika ia baroh ki nongtrei ba ha khmat kynthup ruh ia ki nongrep, ki nongdie jingdie, khamtam ki nongdie madan, ki nongniah kali kamai, ki Asha, ki nongtreikam shnong, ki nongrei kynta ing briew, ki nongbylla sngi, bad baroh ki nongtrei sorkar.
5. Ba ka sorkar kan pynkhlain biang ia ki Community Covid Management da kaba pynkup bor ha ki bad khamtam eh da kaba kyrshan pisa ia ki Dorbar Shnong na ka bynta ban iakhun ia ka jingpang Covid-19 ha kane ka kynti ba ar.
6. Ban ai jingiarap kham kloi bad jingkyrshan ia baroh ki nongbylla sngi, kynthup ia ki nongrep, ki nongbylla sngi, ki nongtrei kynta ing briew, ki nongniah kali kamai bad bun kiwei kiwei kiba duh kamai ja kpoh namar ka jingpynsangeh ia ka jingbylla jong ki.
7. Ki don ruh ki nongbylla kiba trei bnai ha ki agency bad ki company bapher bapher kum ki contract casual workers ne ki MTF hynrei ki ot tulop pat haba ki nongbylla kim lah ban leit trei khamtam ha ka por ba khang khyrdep. Ka sorkar ka dei ban iarap bad pyntikna ba kine ki nongbylla kin ym duh ia ki hok jong ki lada jia ba ka sorkar kam banse ban khang khyrdep ia ka leit ka wan.

Sa shisien ka jingkyntu ia ka ka sorkar jylla ba kan long kaba sngewkhia ban leh ia kaba donkam ban iada ia ki paid nongshong shnong da kaba kham pynstet ban shim ia ki rai. Ka jingkyntu ka long kumjuh ruh ia ki paidbah ban long kiba kloi ban bat pyrkhing ia ki lad jingiada na ka bynta ialade bad ia kiwei ruh kumjuh.

Khublei shibun eh.