Ngam kwah ban kren eiei ba dang iaid ka jingtohkit: Dr Mukul rHalor ka jingiap U SI PJ Marbaniang

Shillong,
20 Rymphang:  
U Myntri Rangbah ka jylla u Dr Mukul Sangma u la ong ba kam pat dei ban kren eiei halor ka jingiap jong u sub-inspector Bah PJ Marba niang namar ba ka dang iaid ka jingtohkit.
“Ngam pat kwah ban kren eiei ha kane ka por namar ba ka lah ban ktah ia ka jingtohkit”, la ong u Dr Sangma haba kren mynta ka sngi Thoh dieng sha ki nongthoh khubor.
U la ong kaei kaba donkam ha kane ka khyl lipmat ka long ban wad ia ka jingshisha.
”Ka jingtohkit kan tohkit bniah halor kane ka kam. Ngi ailad ba kan wad ia ka jingshisha halor kane ka kam”, la ong  u Myntri Rangbah.
Ka lok jong u Bah Marbaniang ka Kong Chaleth Pyngrope kaba la leit peit ia ka jaka sah jong u lok jongka ha jaka sah ki pulit ka la sngew lyngngoh ban iohi ba la don ba pynkhuid ia katei ka kamram, kynthup ki jain ki nep, ki khiew ki pliang, bad kane ka la buh ia ka jingsuba kaba jur ba ka la don eiei ha lyndet ia ka jingiap jong u Bah Marbaniang. Ka la suba jur ba la don ba pynsniew ia ki sakhi.
”Hynrei, nga kyrmen ba ka hok kan sei ia ka jingshisha bad kito kiba donkti kin shah pynshitom katkum ka ain’, la ong ka Kong Pyngrope. Ha ka jingleit tohkit, ka kynhun SIT ka la lap ia u dak kuli ha sad katei ka jaka sah jong u SI bad la buh dak ia ki jaka thiah ha madan katei ka kamra jong u heh pulit ba la khlad. Ia ka met jong u Bah Marbaniang, uba peit ia ka Patharkhmah Police Outpost la lap ha ka miet 24  tarik Kyllalyngkot hadien ba u la bat 32 tylli ki trok kit dewiong beain ha katei ka thain.