Yn pdiang ka Meghalaya ia ka tamasa Bam Tynrai ha u Naiwieng rPalat T. 10 klur mang ka sorkar ban pynlut

Shillong,
20 Rymphang:  
Ka jylla Meghalaya kan pdiang ia ka Tamasa Bam Tynrai ne ka International Indigenous Terra Madre Festival ha u Naiwieng mynta u snem ha Mawphlang.
Ia kane ka tamasa ka ban neh san sngi yn pynlong da ka sorkar Meghalaya, lem bad ka North East Slow and Agro-biodiversity Society ryngkat 40 tyllli ki shnong ha kane ka jylla kynthup san tylli ki shnong na Nagaland.
“Ngi la pdiang ban ai ia ka jingiatreilang bad kyrshan ia kane ka Tama sa kaba nyngkong ha India. Ka sorkar jylla ka kmen ban iatreilang na ka bynta kane ka jingthmu”, la ong u Myntri Rangbah u Dr Mukul Sangma haba kren mynta ka sngi, sha ki nongthoh khubor hadien ba la wai ka jingialang bad ki heh ka NESPAS kynthup u chairman, Bah Phrang Roy ban iakren ia ka jingpynkhreh na ka bynta kane ka jingthmu.
U Myntri Rangbah u la ong ba ha kane ka tamsa, ki paidbah na ki jylla kane ka thain kin wan ban iashim bynta ban pyni ia la kijong ki kolshor bad ki rukom im jongki kaban long kum ka rynsan ban pynpaw pyrthei.
 ”Ngi la dep sdang ia ka kam. Ngi la pan born a ka tnad  bar ri ka ri ban ailad ban pynlong ia kane ka Tamasa. Ngi la thung ia ki heh sorkar ban buddien ia kane ka kam”, la ong u Dr Sangma.
U la ong ba ka sorkar ka kwah ba ki paidbah kin wan ban iashim bynta shit rhem ha kane ka tamasa.
“Ngan thoh ruh sha baroh ki Myntri Rangbah kane ka thain Dong Mihngi ba kin phah ia ki nongiashim bynta ha kane ka Tamasa”, u la ong.
U la ong ba ka jinglut na ka bynta kane ka Tamasa kan ym duna ia ka T.10 klur hynrei ka lah ban kham bun ruh ia kane namar ba ka donkam ban shna ia ki surok bad kiwei ki jingdonkam sha kajaka ban pynlong ha Mawphlang bad ka sorkar ka la dep mang kham mynshwa T 20 ban shna surok.
Ha kajuh ka por u chairman ka NESPAS u la iathuh ba kumba 500 ngut ki bar ri kin wan ban iashim bynta ha kane ka Tamasa na ki 70 haduh 80 tylli ki jait bynriew na ki 40 tylli ki ri ka pyrthei.
U Bah Phrang  Roy, u la ong ba kane ka Tamasa kan phaikhmat ha ki jingbam tynrai, ki jingtip tynrai, ki ktien tynrai bad ka jingpynneh ia ki kynja baim.
 ”Ngim lah ban pynslem ia ki jingpynkhreh na ka bynta kane ka kam”, la ong u Myntri Rangbah.
Kum kane ka Tamasa la pynlong ha u Jylliew ka 17 tarik haduh 19, 2011, ha Jokkmokk (Sápmi, northern Sweden).