Yn thaw ain ka sorkar ia ki Rangbah Shnong, ong u Dr Mukul

Shillong,
20 Rymphang:
Haba pynpaw ia ka jingsngew khia ia ka jingshah sloit iktiar ki Rangbah shnong ha ka High Court, u Myntri Rangbah ka jylla u Dr Mukul Sangma u la ai ksai ba ka sorkar ka lah ban thaw noh da ki ain ia ki bor bad ki kamram jong ki Rangbah Shnong.
”Ngi dang eksamin mynta ia ki ain bad ki kyndon jong ka riti synshar ka ri ban wad la ka sorkar jylla ka lah ne em ban thaw ain ia ki Rangbah Shnong khnang ban weng ia ka jingeh kaba la mih na ka rai jong ka High Court” la ong u Dr Sangma haba kren sha ki nongthoh khubor ha ka sien kaba nyngkong hadien ba la mih ka rai na ka Kashari pyrshah ia ki rangbah shnong.
Haba kylli hato ki district council kim dei ki bor ba la pynkup bor da ka riti synshar ka ri katkum ka Sixth Scheduled, u Dr Sangma u la ong ba katkum ka riti synshar ka ri, ki ain ba shna ki district council kin iap noh lada iatyngkhuh bad ki ain ka sorkar jylla. 
U la ong ba ka sorkar jylla ka dang eksamin ia ki ain ban weng ia ki jingeh jong ki rangbah shnong hadien ba la mih ka rai na ka High Court.
“Ngin thaw lad kumno ban weng noh ia kane ka jingeh kloi katba lah”, la ong u Myntri Rangbah.
Shwa ia kane, ka sorkar jylla ka la pan jingshai na ka KHADC halor ka ain Khasi Hills Autonomous District (Village Administration) Bill, 2014  kaba thmu ban pynkup bor ia ki Rangbah Shnong.
Halor kane, ka KHADC ka la thoh kylla sha ka sorkar jylla da kaba pan jingshai kiei ki kyndon ki bym iahap namar ba ka sorkar jylla kam shym la kdew shai.
“Ka shithi ba ngi ioh na ka sorkar jylla kam long kaba shai”, la ong u CEM ka KHADCu Bah Adelbert Nongrum.