Da ka jingiakhih, byrngem ka kynhun ki nonghikai SSA lada ka Sorkar kam pyllait tulop

Shillong: Ka kynhun jong ki nonghikai SSA kiba don hapoh ka shatri jong ka Meghalaya SSA School Teachers Association (MSSASTA) ki la pynpaw ia ka jingsngewkhia halor ka jingbym pyllait satia jong ka tnad pule puthi bad ka tnad pla tyngka jong ka Sorkar jylla ia ka pisa kaba dei ka second installment ia kaba la mang da ka sorkar pdeng na ka bynta ban siew tulop sha ki nonghikai SSA kiba don hapoh ka jylla baroh kawei.

Ha u kyrwoh ba la phah sha ki lad pathai khubor ha ka 20 tarik u Iaiong 2021, u President jong ka seng, u Bah Aristotle Rymbai, u la ong ba lada ka sorkar jylla kam pyllait noh mardor ia kane ka tulop jong ki nonghikai, ka seng hi kam banse ban pynlong da ki jingiakhih katkum ka riti synshar paidbah.

U Bah Aristotle Rymbai u la ong,”Mynta ka sngi ka Meghalaya SSA School Association Central Body ngi pynpaw ia ka jingsngewkhia ia kane ka jingleh jong ka tnad ka pule puthi bad ka tnad pla tyngka jong ka jylla Meghalaya halor ka jingbym pyllait ia ka pisa jong ka second installment jong ka Sorkar India ba la pyllait da ka State Education Mission Authority Meghalaya kaba long ka nongpyniaid ia ka prokam SSA ha ka jylla kaba la ialam sha ka jingbym siew tulop ia ki 12541 ki nonghikai SSA ha ka jylla na ka bynta u bnai Kyllalyngkot bad u bnai Rymphang jong ka mang tyngka jong u snem 2020-2021. Katkum ka jingioh jingtip kaba bniah, ngi ioh jingtip ba ka tnad pule puthi jong ka Sorkar Pdeng ka la phah ia ka pisa na ka bynta ka second installment ia ka Meghalaya hashwa ka 31 u Lber mynta u snem. Hynrei ka pynlyngngoh ia ka kynhun jong ngi haduh kane ka sngi ka dang sahkut sah bad ka tnad pla tyngka jong ka jylla wat u State Project Director jong ka SSA, u Ambrose Marak ha ka 31 u Lber mynta u snem u la pyllait ia kane ka hukum sha baroh ki 11 tylli ki distrik ha ka jylla ha ryngkat ka jingbtai ba ki dei ban siew ia ka tulop sha ki 12541 ngut ki nonghikai SSA na ka bynta u bnai Kyllalyngkot bad u bnai Rymphang mynta u snem khlem ka jingpynslem. Ngi pynrem ia kane ka jingleh jong ka tnad pule puthi bad ka tnad pla tyngka bad ngi dawa na ka ka sorkar jylla ba ka dei ban pyllait noh ia kane ka pisa hashwa jong une u taiew. Lada ka sorkar kam lah ban leh ia kata, ngim banse ban iakhih noh katkum ka riti synshar paidbah kum ka dak ka jingiakhih ban pyrshah ia ka jingbym leh suidñiew bad ka jingleh mynthi jong ka sorkar jylla”