Ka sorkar kam kwah shuh ban khang dam, ong U MR

Shillong:U Conrad K Sangma, myntri rangbah ka jylla, myn hynnin ka sngi, u la ong ba ha u snem ba la dep, ka jylla ka la mad ia ki jingeh kiba khraw, namar ka khlam covid -19, hynrei mynta u snem ka sorkar kan ym kwah ban khang dam shuh, hynrei ka sorkar kan pyrkhing ia ki kyndon ha kaba ia dei ban iada ia ka khlam covid ba kan sap hriang bad kane ka lah ban pynurlong ha ryngkat ka jingsnoh kti lang jong ki paidbah ka jylla.

Ha kaba ia dei bad ki nongtrei ha ki ophis bapher bapher, ka sorkar jylla ka la rai ban shah 50% ki nongtrei ha ki ophis jong ki riewshimet bad ki ophis sorkar, hynrei ha kaba ia dei bad ki bank, ki Post office bad kiwei kiwei ki ophis kiba donkam ki lah ban trei kam kumba ju long.

La ong ruh ba ka sorkar jylla, kan ym khang ia ki iew bad ia ki dukan, hynrei la shim ia ka rai ba ia ki dukan bad kiwei kiwei ki jingtrei ki lah ban plie kumba ju long, hynrei ki dukan ki dei ban bud pyrkhing ia ki protocol bad lada lap ba ki dukan kim bud ia ki protocol ka sorkar kan phah ban khang khyrdep noh.Ha ka juh ka por la bthah ruh ia ki nongpyniaid shnong ba kin peitngor bad ban bthah ia ki nongdie dukan ban pynthikna ba kan ym don ka jingpynkhein ia ki protocol.

Ha kaba ia dei bad ki Hotel bad ki Restaurant ka sorkar ka la shim ia ka rai ban buh ia ki kyndon ha ki restaurant bad ki hotel ban shah tang 50% ki briew bad ia kine ruh yn peitngor bha, ha kaba yn pynthikna ba kan don ka jing bud ryntih ia ki protocol.

Ka sorkar ka la khang ia kino kino ki jingialang paidbah ha nongbah Shillong na ka bynta ka 14 sngi, kumjuh kan don ruh ka jingpyrkhing ha kaba ia dei bad ki jingiap briew, hynrei ha kaba ia dei bad ka jingkhawai ia thoh bad ki jinglehniam ka sorkar kan ym khang, hynrei kane kan donkam ia ka jingioh jingbit na ki Deputy Commissioner.

Ka sorkar kan ym lah ban khang ia ki jaka jngohkai kiba lah ban pynthikna ia ka jingwan tuid u paidbah kum ka Wards Lake, hynrei ki jaka jngohkai pyrthei ki ba ym lah ban khang ia ka jingwan rung ki paidbah ka sorkar kan khang kum ha Golflink.

U Myntri rangbah, u la ong ba ban iada ia ka khlam covid ba kan saphriang ha ka jylla, donkam ia ka jingsnohkti lang jong u paidbah ba yn bud pyrkhing ia ki kyndon ba la pynmih da ka sorkar.