Ujor ka HYC, ba tuid ki jakhlia, na ki karkhana sha wah

Shillong:Ka Hynniewtrep youth council Jaintia Hills District Unit hynnin ka sngi 15 tarik mynta u bnai, hapoh ka jingialam u Environment Secretary samla Apdame Papiah ryngkat bad ki dkhot ka seng ki la leit ban ujor sha u Deputy commissioner West Jaintia Hills District ha kaba ia dei bad ki Karkhana shna kali (Automobile) bad kumjuh ruh ki welding kiba don ha baroh ka District halor ka jingud ki paidbah iaka jingjakhlia ki umbam umdih na ka jingtuid ki jakhlia jong kitei ki karkhana sha ka wah Myntdu bad ka wah Umiurem.

Na ka liang jong ka seng ka dap da ka jingsngew khia halor kane, namar dei lyngba ka jingleh khlem akor kitei ki karkhana kan ktah ia ka koit ka khiah ki paidbah ki ba pyndon kam ia kitei ki wah. Na ka liang ka seng ka kyntu sha baroh ki trai karkhana shna kali bad welding kiba don ha poh West jaintia hills district ba kin sngewbha ban shna da ka thliew ban pynlang ia ki jakhlia jongki lym kumta ka seng kan iaid da kawei pat ka lynti ba kham tyngeh.