Byrngem ka COMSO ban khang tala ia ka Secretariat, lada kam sngap ia ka jingdawa ILP

Shillong: Hadien ba ki jingkular jong u Myntri Ki Kam Pohiing ka Ri, u Amit Shah ki la shu pynsah lyngngoh bad pynsah umdum ia ki paidbah ka jylla halor ka jingkular ka jong u ban wan shane sha Nongbah Shillong ban iakren sani bha bad ki sengbhalang halor ka mat kaba ktah matïong ia ka Ri bad ka Jaitbynriew kata ka Inner Line Permit(ILP) kaba long ka mat kaba lah da ki snem mynta ka la shu sahkut kumto ha kaba ki paidbah bad ki sengbhalang ki la ia mih shakhmat ban dawa ban pyntreikam noh ia ka hapoh ka jylla, hynrei mynta ka sngi ka 16 tarik u Iaiong 2021, ban pyni ia ka jingbym lah shah shuh ban shu sngap kumto, na ka liang ka Confederation of Meghalaya Social Organizations (CoMSO) ka la tur puk sha Secretariat bad da kaba ka la byrngem ban khang noh ia ka Secretariat, lada ka Sorkar kam lah ban pyntreikam mardor ia ka ILP hapoh ka jylla Meghalaya.

Ia kane ka jingong la kren da u Bah Roy Kupar Synrem, u ba dei u ba dei u General Secretary jong ka COMSO, haba u la ai jingkren lyngkot hashwa ba ki dkhot jong ki sengbhalang kiba pher ba pher kin ia pra noh hadien ka jingleit kynsan ka jong ki mynta ka sngi Thohdieng sha Secretariat ha kaba ki la mih ruh ki sur pynrem na kine ki sengbhalang ia ka Sorkar MDA.

U Bah Roy Kupar Synrem u la ong,”Mynta ka sngi ngi ia wan tang katto katne ngut ban pynkynmaw ia ka Sorkar ia kaei kaba ma ka, ka la leh ha u snem 2019 ka la pass ia ka official Resolution ban phah sha Delhi hynrei mynta la shisnem tam, ki la shu iohthiah lyngngai khlem leh eiei tang ki jingkular thok jingkular lamler na kawei ka por sha kawei ka por. Kane ka sngi ka dei tang ka jing maham, ia ka sorkar MDA ba lada kam lah leh eiei ha kine ki khyndiat sngi bad ki khyndiat bnai, ka COMSO ka la dep ban rai ban leit sha u paidbah nongshong shnong jong ka jylla baroh kawei bad ha ki sngi ki ban wan ngin sa wan ban khang tala ia ka Secretariat. “Kam myntoi ba phin shong shuki hangtei lada phim lah ban peit ia ka Jaitbynriew. Ka ILP ka dei ka jingangnud jong uwei pa uwei u dkhot jong ka jaitbybynriew bad jong ka jylla hi baroh kawei ba lada phim lah ban ialam ia ka sorkar ban pyntreikam ia ka ILP ha ka jylla ka jong ngi, ngin wan da u paidbah ban khang tala ia ka Secretariat”.