Yn nym lah shuh ban khang dam ia ka jylla, ong U SMR

Shillong:U Symbud Myntri rangbah ka jylla, u bah Prestone Tynsong u la ong, ba wat la ka jylla mynta sa shisien ka la sakhi biang ia ka jingkiew jong ki briew kiba ioh ia ka jingpang Covid -19, hynrei ka sorkar kan ym lah ban pyntreikam biang ia ka jingkhang dam ha ka jylla, hynrei ka sorkar ka lah ban pyntrei kam ia ki kyndon kiba pyrkhing ban iada na ka khlam Covid-19.

Haba ia kren bad ki lad pathai khubor, u bah Prestone, u la ong ba ka jinglong jingman jong ka jylla ha ka ba iadei bad ka khlam covid 19 kam long ka ba bha, namar ka jingkiewsted ki nongpang Covid -19 ha ka jylla ha kine ki arsngi, hynrei ban buh ia ka jingkylli ban pyntrei kam biang ia ka jing khang dam ha ka jylla kan ym mih, hynrei ka sorkar ka lah ban pyntreikam ia ki kyndon ki ba pyrkhing ban iada na ka khlam Covid -19.
U la iathuh ruh ba ban peitngor bha ia ka jingkiew lane ka jinghiar jong ka khlam Covid -19, ha ka jylla ka sorkar ka la shim ia ka rai ban pynlong ia ka jingialang, 2 lane 3 sien ha ka shitaiew, namar ba ka jinglong jingman kam long kaba bha ha ka jylla kaba nang kiew man ka sngi.

U la kyntu ia ki nongshong shnong ha ka jylla ba kin long ki ba phikir bha ia lade ban iada na ka ne ka khlam Covid -19 bad kane ka long ka ba baroh ki la tip bad nang namar ba la palat shisnem ki briew ki la bud ia ki kyndon ban iada ia lade na kane ka khlam Covid -19.