Pynrem jur ka TUR, halor ka jngthombor ha Mawshbuit

Ka Thma u Rangli Juki ka pynrem jur ia ka kut shipai jong ka Gorkha Training Centre kaba don hajan Mawshbuit bad ia ki shipai kiba don kti ha ka jingthombor bad jingpyndik ia ka iaid ka ieng ki nongshong shnong ha katei ka dong ka thain.

Kane kam dei ka sien kaba nyngkong ba ki nongshong shnong ka dong Mawshabuit bad ki shnong ba marjan kin shah thombor bad shah pyndik kumne.

Naduh ba ioh ia ka Jylla ha ka snem 1972 ym shym la don kawei ruh ka Sorkar kaba la shim khia ia ki kam kiba iadei bad ki jaka ka tnat iada ri ka Sorkar India kiba don ha Shillong. Ka Nongbah Shillong ka dei ka Nongbah kaba bun tam ki len shipai kiba ka jingheh ki len shipai bad jaka ka tnat iada ri ki la long da ki spah ne hajar akar lada khein kyllum lang ia ki naduh kito ki jaka ba la don lypa naduh ka Sorkar Bilat bad kiwei kiba ka tnat iada ri ka dang shu shim thymmai.

Ha shuwa ban ioh ia ka Jylla kam shym don kino kino ki dak kiba pynpaw ba ki bor District Council bad ki kynhun jong ki Hima kin shim khia ban iakren iapynbeit bad ka Sorkar India . Kynmaw ba ia ka Sor Shillong la tawiar bad ker sawdong da ki len shipai bad barabor ki shipai ki ju pyndik ia ka iaid ka ieng bad ka trei ka ktah. Kum ka nuksa ki shipai ki la khang dam ia ka lynti iaid kjat na Civil Hospital sha Khyndailad ka lynti kaba iaid na syndah ka Lady Kean College kaba ki khot ka “pine walk” kaba long ruh ka lynti iaid kjat kaba pyngngad bad kaba suk bad jan tam sha iew Khyndailad. Nangta ki nongrep ka thain Laitkor Pomlakrai bad Lawsohtun kiba mad ia ki jingeh na ka por sha ka por. Kumjuh ruh ha Upper Shillong bad kaba sngewsih kthang eh ka long ba ki shipai ki la knieh ia ka Madan Kirkit ha Laban.

Ka TUR ka dawa na ka Sorkar India kumne harum:

1. Ban pyshitom ia ki shipai kiba donkti ha kaba pyndik bad thombor ia ki nongshong shnong.
2. Ban thung ka kynhun tohkit kaba laitluid halor baroh ki jingjia bad jingpyndik jong ka tnat iada ri bad ki len shipai bapher.
3. Ban pynphai noh ia ki jaka jong ka tnat iada ri bad ban iapynbeit ia kane ka kam bad ka Sorkar jylla, District Council, ki Hima bad Dorbar Shnong.
4. Ban plie biang ia ki jaka iaid lynti ba iaid lyngba ka len shipai khlem kino kino ki jingteh kyndon.
5. Ban pynphai noh mardor ia ka Madan Kirkit ha Laban.
6. Ba ka Sorkar Jylla kam dei shuh ban ai jaka ia ka tnat iada ri bad ki len shipai.
7. Ba ha kito ki jaka kiba ki nongshong shnong ki dei ban iaid lyngba ka len shipai kum ka lynti sha Mawshabuit, ki tnat shipai bad tnat iada ri ka Ri India ki dei ban pynkynriah noh ia ki shipai bad ai noh ka jaka khnang ban lah ban pyniakhlad da ki kynroh bad ban lait na ki jingeh bad jingshah pyndik hadien habud.
8. Ba ka District council ki Hima bad ki Dorbar Shnong kin ym shah ia ki trai khyndew ban ai jaka thymmai sha ki shipai.
9. Ba ka Sorkar Jylla kan thung da ka commission ka ban kynthup ia ki riewpaidbah na ka bynta ban shim bad buddien ia ki jingujor ki paidbah halor ka jingpyndik ki shipai bad ruh ban wad bniah ia ka jingdon bad jingheh ki len shipai bad ki soskular ba ki iateh bad ki trai ri naduh ka por ka Sorkar Bilat.

Angela Rangad