Ka jingbun ki nongthep vote kaba la kot sha ka 69.42 percent ha ka elekshon GHADC

Shillong: Ka jingthep vote na ka bynta ka elekshon Garo Hills Autonomous District Council(GHADC) ha ka jylla Meghalaya ka la kut noh ha ka jingiaid iaid beit iaid ryntih ha ka sngi nyngkong kaba kot kumba 69.42 percent ki nongthep vote kiba la wan ban thep vote.

Ki la don kumba 953 tylli ki jaka thep vote (polling booth) ha ki 29 tylli ki konstitwensi jong ka GHADC.

“Ka jingkheiñ kaba kot kumba 69.42 percent jong ki nongthep kiba don kumba 7,43,717 ngut kiba la pyndonkam ia ka hok ka jong ki,”la ong u dkhot u ba dei peit ia ka elekshon hadien ka jingthep vote ha ka sngi nyngkong.

Shuh shuh une u dkhot u ba dei peit ia ka election u la ong ba ka jingiathep vote ka la long kaba iaid beit da ka jingjai jai bad ym shym la don kano kano ka jingleh buittuh ha kaba pyniaid ia kitei ki kor mashin thep vote(EVM) ha ki kynta ka jingiathep vote.

Ka jingiathep vote na ka bynta ka elekshon GHADC ka la sdang naduh ka por 7 baje mynstep jong ka sngi nyngkong hapdeng ka jingpahara kaba jur bha khamtam ha ki jaka thep vote kiba ju mih ki jingjia bad ki jingklumar.

Watla ki nongthep vote ki duna bha ha ki ar kynta ba la sdang ia ka jingiathep vote kaba kot tang kumba 14.63 percent haduh ka por 9 baje mynstep hynrei ka la nang kiew pat hadien katba nang iaid ka por.

U Myntri Rangbah jong ka Jylla, u Conrad K Sangma u la ieng laiñ ban thep ia ka vote ka jong u ha ka jaka thep vote ha Walbakgre LP School kaba don ha Tura.

Ka jingthep vote ka la iaid beit shakhmat watla ka la don ka jingiakhih da kiba bun ki sengbhalang ha Garo Hills ban pyrshah ia ka jingailad ban iashim bynta da ki bar jylla kum ki nongthep vote bad kum ki kyrtong.

Ki seng kiba bat ia u lakam synshar kata ka National People’s Party(NPP), ka Bharatiya Janata Party(BJP) bad ka seng Congress kaba don sha ka liang pyrshah ki la pynieng ia ki kyrtong ki jong ki kiba dei ki bar jylla ha ki katto katne ki konstitwensi khamtam ha ki jaka them jong ka Garo Hills kaba don ka jingiakhleh jaitbynriew.

Kumba 182 ngut ki kyrtong kiba kynthup 8 ngut ki kyrtong kynthei kiba la iashim bynta ha kane ka elekshon GHADC bad kiba la don ha ki kor thep vote(EVM).

Ia ka result yn pynbna ha ka 15tarik u Iaiong 2021.