Ha ka random test ha Nongpoh, la lap uwei u briew ba khlem deng Mask u ioh COVID-19

Nongpoh: Ha ka Random Test ne kaba test naphang ia ki briew kiba iaid ba ieng khlem ki Mask kaba hynne ka sngi kaba la pynlong hajan ka MUDA Market Complex ha Nongpoh, la ioh ban Test kumba 56 ngut ki briew bad na kitei ki 56 ngut, la lap ba uwei u briew uba khlem deng Mask, u la paw ba u la ioh ia ka Khlam COVID-19.

Ia katei ka Random Test, la pynlong da ka ophisa ka Deputy Commissioner Ri Bhoi, ha ryngkat ka jingiatreilang bad ki briew ka koit ka khiah, ha kaba ka nongrim kaba la pynlong ia ki bor distrik ka Ri Bhoi lem bad ia ki briew ka koit ka khiah ba kin pynlong ia katei ka Test kyllum ia ki paidbah, ka dei hadien ba ki la iohi ba ka la don ka jingsdang ban kiew biang ha ka jingdon ki briew kiba ioh ia ka COVID-19, ym tang ha ka District hynrei ha ka jylla hi baroh kawei.

Ia katei ka kam ban test kynsan kynsan ia kito ki briew kiba ym deng Mask, la ialam da u Bah R. Kharbihkhiew, EAC ka Ri Bhoi, ha ryngkat ka jingdon ki briew ka koit ka khiah bad ryngkat ka jingiarap ki Pulit na Ri Bhoi, ha kaba la test ia kito ki briew bym deng Mask lyngba ka Antigen Test.

Ha kawei pat ka liang, na ka liang ka Kong RM Kurbah, DC Ri Bhoi, ka la kyntu ia ki paidbah ba ki dei ban phikir ialade bad ha kajuh ruh ka por ba ki dei ban bud ryntih ia kaei kaba la bthah da ki briew ka koit ka khiah, nalorkata ba ki dei ban deng ia ki jingda khmut (Mask), khnang ba kan iada na ka jingsaphriang stet ka khlam COVID-19.

Ka la pyntip ruh sha ki paidbah, ba na ka liang ki bor District kin teh pyrkhing biang ba baroh ki nongshong shnong hapoh ka District, kata ka long ba ki dei ban bud ryntih ia ki kyndon ba la buh da ka sorkar bad kito kiba pynkhein ia ki kyndon kin shah ngat ha ka kuna.

Ka Kong RM Kurbah, ka la kyntu ia ki paidbah ba ki dei ban shimkhia halor ban iada na ka jingsaphriang ka khlam COVID-19, ha kajuh ruh ka por ka la kyntu ia ki paidbah ba ki dei ban phikir bha ialade, khnang ban iada na ka khlam COVID-19 bad ruh ban iada na ka jingsaphriang stet katei ka khlam, kaba la sdang biang sa shisien ban sar ha kiba bun ki jaka.