Shillong: U Director ka tnad ka koit ka khiah, u Dr Aman War, u la ong ba ban iada ia ki khynnah pule na ka jingpang Covid -19, ka tnad ka la dep ban ai jingmut ia ka tnad pule puthi jong ka jylla ba kan phikir bha bad kane ka long ba ha kine ki sngi ka jylla, ka la sakhi ia ka jingdon kiba pang Covid 19 ha ki skul, ki College bad ki University hapoh jylla.
Haba iakren bad ki lad pathai khubor, u Dr War, u la iathuh ba mynta ka sngi iwei i khynnah ba dang pule Cl VI na ka St.Mary School, i la test Covid positive, kumjuh mynta ka sngi ka Shillong College, ka la pynbna ba kan khang 5 sngi namar ka jingioh pang Covid uwei u nongtrei katei ka College, nangta ha ki taiew ba la dep ka skul bah NEHU ka la pynbna ia ka jingioh Covid jong ki 4 ngut ki briew ba sah ha katei ka jaka pule.
Halor ka jingbym shim khia jong ki paidbah ban iada ialade na ka khlam Covid -19, u Dr war u la ong ba man ka por ka tnad ka ju pynmih ia ka jingbthah ban iada ia lade, hynrei lada ki kiew kynsan ki case kumne ka sorkar kan ym banse ban pyntrei kam biang ia ki kyndon ban khangdam. U la ong ruh ba ban iada ia lade na ka khlam Covid 19, ka dei ka kamram jong u paidbah ym jong ka sorkar hynrei lada ka sorkar kan rai biang ban khang dam, ki paidbah kim dei ban kynnoh ia ka sorkar. U Dr War, u la kyntu ia ki paidbah ba kin long ki ba phikir ban iada ialade na ka jingsaphriang jong ka khlam Covid -19, namar la khlam ha ka jylla kam pat kut.
Phi don ban ong eiei?