Ioh iingskul ka Nongkohlew, synniang kiba ngeit

Shillong,
15 Rymphang:
Ka skul Nongkoh lew RCLP ha shnong Nongkohlew hadien 46 snem ka la ioh ia ka ingskul bathymmai na ka bynta ka kyrdan Secondary ia kaba la plie ha ka sngi thohdieng jong ka taiew baladep.
Ia kane ka ingskul bathymmai kaba la tei ha ka jinglut kaba 13.35 lak lyngba u synniang u byn hei ba la noh da ki para bangeit.
Ia kane ka iing skul la plie paidbah da u Bah Embhahlang B. Syiem lieh, MLA ka Mawlai Constituency ba iadon lang u Rev. Fr. Roland Kharkrang, Principal ka skul uba long ruh Parish Priest ka St. Dominic Church, Mawlai Parish, ki nongialam shnong, ki nongialam ka Balang Katholik Nongkohlew, ki nonghikai bad ki khynnah skul.
Ia ka Nongkohlew RCLP la sdang ha u snem 1969 bad lyngba ka jingtrei shitom jong ki nonghikai bad ki bor pyniaid skul ka Balang Katholik, la pynkha pat ia ka Nongkohlew UP SSA bad mynta u snem la pynkha ia ka Nongkohlew Secondary School ka ban long pat kawei ka jingkieng ka ban pun lynti ia ki khynnah skul ha kane ka shnong bad ki thain kiba markhap ban bteng ia ka jingpule ha ka kyrdan Class-IX bad X.
U Bah Embhah haba kren kum u Kongsan u la ong ba un ym klet ban noh ia u synniang sha kane ka skul bad wat ha ki snem ba u dang long tang kum u MDC u la lah ban iarap lem ia ki jingdonkam kane ka skul.
Ki bor pyniaid skul ki la pynsngew ha une u nongmihkhmat ia ki jingdonkam jong ka skul ha kaba iadei bad ka jingker kynroh, ban iarap lem na ka bynta ban maramot ia ka skul bad ban noh synniang lem na ka bynta ka jingsiew tulop ia ki nonghikai.
Hadien kane, u MLA u la aiti ruh ia ki kor pynsawa sha ka shnong Nongkohlew.
La ioh jingkren ruh na u Rev. Fr. Roland uba la sneng ia ki khynnah skul ban don ka mynsiem iakhun bad trei shitom nalade khlem da pynsep ei ia ki por shongskul.