Pynkhreh ka KHNAM ban sei kyrtong ha ka election shiteng samoi na Mawryngkneng Constituency

Shillong: U Bah Adelbert Nongrum, nongialam jong ka Khun Hynniewtrep Nation Awakening Movement, u la pyntip ba ka KHNAM, kan sa pynkhreh ban buh ia u kyrtong ban ia khun ia ka election shiteng samoi na ka bynta ka Mawryngkneng Constituency.

Haba ia kren bad ki lad pathai khubor, na ka liang u bah Nongrum u la ong ba haduh mynta ki don arngut ki kyrtong kiba i biang ban ia khun na ka party KHNAM bad ia kine yn sa shim ia ka rai ban ai tiket ia uwei na kine 2 ngut.

U la ong ruh ba ka party ka kyrmen skhem ban ioh ban sei ia u briew u ban ioh ia ka jingjop ha ka ne ka election shiteng samoi bad u la ong ruh ba kam ym don jingmut ia jingdon ka KHNAM lada kim lah ban buh kyrtong.

Haduh mynta, na ka liang jong ka NPP ka la sei ia u bah Pyniaid Sing Syiem kum u kyrtong jong ka bad kumjuh ka Congress, ka la sei ia u bah Highland Kharmalki, ban ia khun ia kane ka election shiteng samoi ha Mawrynkneng Constituency.