Shillong: U Prof L S Gassah, haba kren ha ka jingialang ba la pynlong da ka seng HSPDP, ban ia mir jingmut halor ka Sixth Schedule, u la ong ba ka Sixth Schedule ka neh kumjuh, hynrei kiba pynsniew dur dei kiba pyntrei ia ka.
Haba kren kum u nongai jingpynshai ha kane ka jingialang, u la kynthoh ba bun na ki MDC kim tip ia ka Sixth Schedule, haba kim tip kumno kin pyniaid ia ka, dei na kane ka daw ba sa mih ka jingdawa ba ym don kam shuh ia ka Sixth Schedule, namar ka jingleh jong ki katto katne kiba ioh ban bat ia ka bor.
U Prof Gassah, u la ong ba ka jingwad jingtip bad jingshai jong ki briew ha kaba ia dei bad ka Sixth Schedule ka long wat na shiliang duriaw, na America, Japan bad ki nong Ladak ha dien ba kila ioh ia ka Union Territory.
Ban tip ia ka bor bad ka iktiar jong ka Sixth Schedule, dei ban pule ia ka bad kum juh ia ka jingiathir hapoh ka dorbar bah jong ka Ri India jong u snem 1949 jong ka tarik 5, 6 bad 7 tarik u Nailur ba kumno la iakren bad la pynrung hapoh ka Riti Synshar jong ka Ri India ha ka artikel 244 (2) bad 275(1).
La ong ba ka Sixth Schuedule, ka la don ka jing pynkup bor bor hapoh ka Riti Synshar jong ka Ri India bad ha Meghalaya la plie paidbah ia ki ar tylli ki District Council ka dei ha ka 27tarik Jylliew 1954 kaba dei jong ka UKJHADC bad GHADC katba ia ka JHADC la plie ha u snem 1967.
Haba ia dei bad ka jingkwah ban pynkylla ia ka Sixth Schedule, ka la dei naduh u snem 1954 ha kaba u Captain WA Sangma u long u CEM ba nyngkong ka GHADC ha u snem 1954 bad ka jingkwah ka wan biang ha u snem 1988, ha ka por jong ka INC bad haduh mynta ka dang sah bad ka Para 12 (A) ka dang sah haduh mynta ha Meghalaya.
Kiwei kiba la kren ki long u bah Samlin Malngiang MLA, bah Reniktone L Tongkhar myntri sorkar, bah M N Mukhin EM jong ka KHADC bad baroh kine ki nongkren ki la kren shai ba la khot ia ka jingialang ban ia shai halor ka bor bad ka iktiar jong Sixth schedule ban ia jaidbynriew. Ia ka jingialang la pyniad da u president ka seng u bah KP Pangniang.
Ha kane ka sngi palat spah ngut, ki nongkyrshan ka party na kylleng ki lum khasi ki la wan ban ia shim bynta ha kane ka jingialang jong ka party ha kaba ia dei bad ka Sixth Schedule.
Ka long kaba shisha kumba kren i Prof. Gassah. Ki MDC ki dei ban tip bniah bha ia ki ADC rule, khnang ba kin sngewthuh ba ka don la ka jong ka bor ban iada ka jaidbynriew rit paid ka jong ngi, ym ban long tang ki nonglum spah ha ka kyrteng jong ka District Council.