Kham khlain ka hukum ka NGT ne ka Kashari? rBan pynpra jingtei beain ha Wahumkhrah

Shillong, 12 Rymphang:
Ka tnad Meghalaya Urban Development Authority mynta ka dang pynlong ia ka jingbishar bniah halor ka ain la ka kham khlain ka hukum jong ka NGT ne kham khlain ka hukum ka iing Kashari, la ong u CEO ka Secretary ka MUDA u bah E Kharmalki haba kren mynnin ka sngi bad u Rupang.
“Ngin hap ban bishar ban pule bniah bha halor ka ain ba la hukum da ka NGT ban pynpra ia ki jingtei ha Wahum khrah”, la ong u Bah Kharmalki.
U la ong ba ia mynta ki dang phah pule ban bishar bniah bha ha ki nongiasaid ain bad lada ka hukum ka NGT ka kham khlain bor ban ia ka NGT ka MUDA kan iaid shakhmat ban pynpra ia ki jingtei beain ha rud wah Umkhrah.
Lah ban kdew ba dang shen, ka NGT Special Circuit Bench ka Eastern Zone ka la bthah ia ka Meghalaya Urban Development Authority (MUDA) ban pynpra naphang ia ki jingtei beain kiba ieng ha phudwah Umkhrah bad Umshyrpi katkum ki kyndon ka ain.
Ka NGT ka la bthah ba ka sorkar jylla ka dei ban weng ia baroh ki jingtei beain baroh kiba don ha phud wah hapoh lai bnai.
Ka NGT ka la pynmih ia kane ka hukum hadien ba la pynlong ia ka jingsngap ia ka jingujor da u nongiasaid ia da mariang u Naba Bhattacharjee, halor ka jingma na ka jingjaboh jong ka wah Umkhrah bad ka wah Umshyrpi ha kane ka sngi Palei.
U Justice Salvi u la ong ba u Deputy commissioner bad u superintendent of police ka East Khasi Hills ki dei ban ai ia ka jingiatreilang baroh katba donkam ia ka MUDA ha ka jingleit pynpra jongka ia ki jingtei beain.
Ka Tribunal ka la pynmih ia kane ka hukum hadien ba la sngap ia ka jingwanrah da u nongiasaid ain ka sorkar u Ranjan Mukherjee ia ka rai jong ka Divisional Bench ka Gauhati High Court ha u snem 2011 kaba hukum ia ka MUDA ban pynpra ia ki jingtei beain ha phud wah Umkhrah.
Haba kdew ia kane ka hukum ka Kashari, u Mukherjee u la ong ba ka Kashari ka la pynksan ia ka sorkar katkum ka bye laws jong ka MUDA ba dei ban pynpra ia ki jingtei beain kiba ieng ha lynter ka phud wah Umkhrah.