Ha u snem 2020, wat la ki nonghikai, ki khlem leit skul, hynrei ki ioh tulop, ong u heh ka MBOSE

Shillong:U Joint Director ka MBOSE, u bah M Marbaniang, u la ong ba lada ka don ka jingiakhih jong ki nonghikai deficit, kan ym lah ban pynthut ia ka jingthoh exam jong ki khynnah ba ialeh ia ka exam MBOSE ka ban wan.

   Haba iakren bad u bah Marba niang, u la ong ba na ka liang ka MBOSE, ka la ai bor ha ki ophisar incharge jong ki Exam Center ban khmih ia ka jingiaid beit jong ki exam.  U la ong ruh “Ka dei ka kamram jong ki ophisar incharge jong ki exam centre, ban pynbiang ia kane lada don ka jingiakhih jong ki nonghikai deficit”.

U bah Marba niang, u la ong ruh ba lada ki nonghikai Deficit ki don jingthmu ban ia khih ha ka por ba don ka exam MBOSE, kane ka long ka bym iahap. “Haba don daw ia ka sorkar,  hynrei kin leh noh ia ki khynnah, te kam iahap, namar kane kam dei ka kam khyllung khynnah bad na ka liang ki nonghikai ki dei ban pyrkhat rangbah ia kane” u la ong.

     Ha ka snem 2020, wat la ki nonghikai ki khlem leit sha ki skul, hynrei na ka liang ka sorkar ka pynbiang ia ka tulop jong ki bad ka sorkar ka la pynlut bun ha ka por ba don ka khlam covid bad bun na ki ophisar ki duh ia ka arear jong ki, bad kumta, ka dei ia ki nonghikai ba kin don ka jingpyrkhat lang, u la bynrap.