Da ka jingiaid paidbah ha Mawkyrwat, ban pynrem ia kiba shoh ia laingut ki samla

Shillong:Hadien ka jingshah shoh jong ki lai ngut ki samla na Wahkaji ha Golflink, Shillong kaba la jia ha ka 21 tarik u Lber 2021, ha kaba uwei na kine ki samla u ba la tip kyrteng kum u Phershan Roy Myrthong u la khlad noh na kane ka sla pyrthei namar ka jingmynsaw jur ka jong u.

Myn hynnin ka sngi ka 31 tarik u Lber 2021 la iohi ia ka jingiamih paidbah ban ia iaid ha ka shnong Maw kyrwat kiba kynthup ia ki sengbhalang kiba pher ba pher kata ka Khasi Students Union(KSU), ka Federation of Khasi Jaintia and Garo People(FKJGP), ka Hynniewtrep Achik National Movement(HANM), ka Synjuk Seng Samla Shnong(SSSS), ka HUNM, ka UHM, ka Tulba, ka Seng Kynthei Saw Symper, ka Seng Langrin Youth Welfare Association bad kiwei kiwei ki riew rangbah jong kane ka thaiñ kiba kynthup lang ia ki longkmie, ki samla kynthei ba shynrang ban pynrem ia ki runar kiba donkti ha kane ka jingjia bad ban dawa na ka Sorkar Jylla ba ka dei ban shim khia halor kane ka jingshah shoh dusmon kitei ki laingut ha ki runar ki bym shym la ithuh satia ki dei kiei ha ryngkat ka jingrah placard. Ia kane ka jingiaiaid paidbah la sdang na ka ophis Block bad la pynkut ia ka jingialang ha ka Iew Mawkyrwat.

Ha kane ka jingialang la ioh ia ka jingkren na u Bah Donald V Thabah u ba dei u General Secretary jong ka KSU, u Bah Eldy Newton Lyngdoh u ba dei u Vice President jong ka FKJGP jong ka sengkmie, u Bah Louis Dohtdong u ba dei u President jong ka seng HNYM, u Bah Wallam Syiemiong u ba dei u President jong ka SSSS jong ka South West Khasi Hills District, ka Kong B Kharbani kaba dei ka President jong ka Seng Kynthei Sawsymper bad kiwei kiwei de ki nongialam jong ki seng kiba pher ba pher bad ki riew paidbah jong kane ka thaiñ.

Ia kane ka jingialang la pyniaid da u Bah Forwardman Nongrem u ba dei u President jong ka KSU South West Khasi Hills District.
Ki nongkren ha kane ka sngi da kawei ka sur ki la pynrem ia ki runar kiba don kti ha ka kam bad ki dawa beit na ka Sorkar ba ka dei ban thwet jur ia kine ki runar bad ban kem mardor ia kine ki runar.