Ba bam ei ki kompeni, da ki klur tyngka, dei ban phah tohkit, ong U bah Bindo

Shillong:U bah BM Lanong, uba dei u nong ai jingmut ba rangbah jong ka seng UDP, ula ong ba ka jinglap ksai ba shyrkhei da u CMD ka MeECL, Mr. A.Kembhavi halor ka jingtuh bording da ki karkhana kiba don hapoh ka Industrial Area Byrnihat, da ka jingiarap ki nongtrei ka MeECL hi, ka la pynpaw pyrthei ia ki kam tuh ba leh buit shalak da ki stad, lynter ha kine ki phew snem, kaba la ktah shibun ia ki paidbah, na ka daw ki jingpynlip ding khah-khah bad ka jingduh bajur ruh ia ka sorkar halor ka jingbam ei ia ka bor ding ka ban shongdor da ki klur tyngka.

Hynrei ka don kawei pat ka khubor kaba pynphriang kylleng, hana ba katei ka jingshem u CMD, kam long kaba shisha, ong shuh U Bah Lanong. “Lada don jingshisha, dei ban iaroh ia u CMD na ka bynta ka jingshlur jong u ba un lap hi bad pynmih pyrthei kat ia kane ka kam bamsap. Nga ai jingmut ia ka sorkar ba kum ka rukom, dei ban phah kem shuwa ia kito baroh kiba iadon kti ha kane ka kambah bad ban dawa ruh ia ka jingduh ka sorkar kaba la dei ban ioh (arrear) ha kine ki phew snem ba la leit noh”.

La ai jingmut ruh ban thung ia ka Enquiry Committee kaban tohkit ia kine ki kam tuh ha baroh kiwei pat ki Industrial area ka jylla bad sha ki karkhana heh ruh jong ki briew shimet kiba don sha kylleng.
Hynnin ka sngi, U CMD of Meghalaya Energy Corporation Limited (MeECL), U Arunkumar Kembhavi, ula aiti ia katei ka jing tohkit halor ka jing tuh bor ding ha Byrnihat, sha ka State Vigilance department, hadien ka jingtohkit jongu, ia ka jing tuhding, da ki katto katne ki nongthang ding ha katei ka jaka trei karkhana.

Ha kawei pat ka khubor, ka la don ka jing kynnoh jong ki nongtrei ka MeECL, ba U CMD lem bad ki katto katne ngut ki ophisar, kiba trei ha ka 33/11 KV Rajabagan sub-station, ki la leit rung sha katei ka karkhana, khlem da pyntip lypa.
U Kembhavi, u ong ba ula leit dalade sha Rajabagan sub-station bad ka dei ruh ha ka sien nyngkong, ba U CMD, ka MeECL, un leit jngoh dalade ia ka sub-station. “Nga don ia ki sakhi ban pyni ba ki don bun bah ki karkhana, kiba thang ding tuh ha katei ka jaka trei karkhana bad ba ki don ki briew jong ka MeECL, kiba donkti ha katei ka kam” bad u iathuh shuh shuh, ba ha ka por ba u plie ia ki meter box jong 10 tylli ki karkhana, hynrei ia ka ding ilektrik, la shu shim tuh bad sam sha ki karkhana.

“Nga don ia ki jingthoh kiba biang, lem bad ki video bad ki dur ruh bad ym don ba lah satia ban ia kajia bad ki meter box ruh la dep seal bad ym don shuh mano mano ba lah ban plie” ula ong shuh shuh.

Ula ong shuh shuh ba ka jinglum pisa jong ka MeECL, ka long tang kumba T.62 bad T.65klur, hynrei ha U Kyllalyngkot bad U Rymphang, ka kiew sha ka T.62 bad T.65klur bad ha U Lber, kan kiew sha ka T.100klur, ula ong shuh shuh. La ong shuh shuh, da U Kembhavi, ba ki meter, ki dei ban bujli shisien san snem, hynrei hangtei, ym shym la bujli satia, wat haba ki la kot palat 17 snem.