Da ka jingiap, ia kito kiba leh benami bad ki bar jylla, ong ka HNLC

Shillong: Ka HNLC, ha ka kyrwoh jongka, mynta ka sngi, ka pyntip ba ka jing khaii benami, ka jur bha ha kine ki sngi, ha ki kam kiba iadei bad ka sorkar bad kumjuh ia kito ruh kiba dei jong ki riew shimet bad kiba donkti ki kynthup ruh ia ki ophisar heh, ha Khasi Jaintia bad ha Ribhoi ruh kumjuh.

La kynnoh da ka HNLC, ba ki heh spah kiba nabar, ki la pyndonkam ia kiba bun ki trai shnong, ki kontraktor bad ki riew sain pyrthei ban ialeh benami bad ban lait ka jingsiew khajna jongki bad mynta, la iathuh ba ki karkhana dewbilat, ki karkhana coke bad kiwei de ki karkhana, ki dei kiba la shu trei benami suda da ki bar jylla, ha ka kyrteng jong ki trai shnong bad la ong ruh ba ki don ruh ki riew sain pyrthei, kiba donkti ha kitei ki kam benami.
Ka HNLC, ka ong, ba na ki 34 tylli ki karkhana coke ha Jaintia Hills, ki don 14 tylli kiba ioh jingbit, tang hapoh 5 bnai bad ki don bun ki nongtrei sorkar, kiba donkti, ha kaba pynioh jing mynjur ia kitei ki karkhana. La ong shuh shuh, ba ki don bun ki nongialam sengbhalang, kiba donkti ha kitei ki kam leh benami bad ki bar jylla.

La ong shuh ba wat la ka jylla, ka don ia ka ain Meghalaya (Benami Transactions Prohibition) (Amendment) Bill, 2018, ha kaba la pyn kylla ia ki kyndon jong ka Meghalaya (Benami Transactions Prohibition) Act, 1980 (Meghalaya Act No 24 of 1980) da ka section 2 (e) bad Section 2 (f).
La ong shuh shuh, ba haba ka ain ban khanglad ia ka benami, kam trei kam satia, kumta ka HNLC, hap ban shim ia katei ka kam dalade hi bad la maham ia kitei ki nongkhaii, ba kin sangeh shi syndon ia ki kam jongki.

Ka HNLC, kan sa pynmih da ka hukum ban siat iap ia kitei kiba don bynta ha kitei ki kam. La ong ruh ba kin sa don ki ban iap, hynrei, ka dei pat ban khanglad ia kane ka jingpang khlam, da kaba ai ia ki u dawai kuli bad kumjuh da u bom IED, ha ki karkhana, ong ka kyrwoh na U bah Saiñkupar Nongtraw, General secretary cum Publicity secretary,HNLC.