Ha khmih ka pyrthei ka la leit bud ia u!

AIS SUJA

Ha khmih ka pyrthei ka la leit bud ia u. kine ki long ki kyntien jong ki pharisi arsap ki jaidbynriew Jiw Israel. Ki iakren paralok hi ki ong – Phi iohi? Ba phim lah eiei ruh em; ha khmih ka pyrthei ka la leit bud ia u. Ioanis 12:19. Ki pharisi ki long ki rangbah niam kiba ialam matlah ia u paidbah. Ki ngeit ha u Blei hynrei kim leh katkum ka jingong ka ktien u Blei. Ki ngeit ha u Blei hynrei kim ngeit ha u khun u Blei (U Jisu khrist), baroh ki jingleh niam jong ki ki pynpaw tang ban iohi briew tang ban ioh iaroh na ki briew. Ki Pharisi ki sumar ia ka sabbaton hynrei kim leh pat katkum ka ktien u Blei. Ki Pharisi ki long kiba mane thala ia u Blei, ki mane tang da ki rukom pateng la pateng ki niam ki rukom jong ki. Mathaios 15:1-9.

Haba u Jisu u lawan ban long briew ha ka doh (born in flesh) kim ngeit, ia kaei kaei kaba u kren kim ngeit, ki bitar shla pynban ia u, ki ong ba u kam khun blei ialade. Haba u Jisu u la leh shibun ki kambah, bad bun ki briew ki la ngeit ha u, ki pharisi ki sheptieng pynban namar ba ki paidbah ki la bud ia u Jisu, u paidbah pat u thait ia ki niam ki rukom arsap, ki ngeit ha u Jisu namar ki iohi ia ki kambah. Dei na kata kadaw ki Pharisi ki ia ong – phi iohi baphin lah leh eiei ruh em iaki paidbah? Ha khmih ka pyrthei ka la leit bud ia u!. Dei hangne ba ki pharisi ki la sdang artatien ia u paidbah bad bitar ia u Jisu namar ki shibun ki dak khyllah bad ki kambah ba u la leh.

Kane ka jia hadien ka jingkhawai ka jingiaid lait (Feast of Passover) ha u snem 32 AD ha ka sngi ba u Jisu u la leit rung ha Jerusalem kum u syiem, u Jisu u la poi ha ka ing u Lasaros ha Bethany bad u la sah miet hangta. Namar kum lashai ka long ka sngi ka jingkhawai Niam ki Jiw bun u paidbah u la poi shata bad ki ioh jingtip ba u Jisu ruh u wan sha Jerusalem, ki paidbah ki la shim ia ki sladieng tlai bad leit tan ia u Jisu, ki da pyrta artad – Hosana long ba la kyrkhu ia u syiem ki Israel…….. kumba la thoh ha u Sekharaiah 9:9. “To wat sheptieng ko khun ka seion ha khmih u syiem jong pha u wan u da shong halor u khun kada”. Ioanis 12:15.

Iakane la iathuhlypa da u prophet Sekharaiah bun spahsnem. Hynrei u Ioanis u pynshisha ia kane ka jingjia haba ka la jia. U Jisu u la sahmiet haing u Lasaros hadien ba u ladep pynmih pat ia u na kiba iap. Ki paidbah ki iaphla ha Jerusalem ha khmat ki pharisi arsap ba u Jisu u la khot ia u Lasaros na ka jingtep, ki Pharisi ki la sngew bitar lep, ki da ong, katto te ka pyrthei baroh ka la leit bud ia u (Jisu).

Kane kadei ka sngi ha kaba ki paid Israel ki la shim ia ki tnat ki dieng tlai ki da pyrta “Hosana long ba la kyrkhu ia u syiem ki Israel. Na Bethany u la dei ban kiew sha Jerusalem bad hapdeng ka jingpyrta Hosana Hosana, ki Pharisi arsap ki la ong ha u Jisu- ko Nonghikai to sneng ia ki synran jong me ba ki halla palat, u Jisu u ong ia ki – Nga ong haphi ba lada kine ki paidbah kin sngapjar, ki maw kin ia kyang buk. Loukas 19:40. U Jisu u la nang iaid halor kadda, ynda u la poi ha Jerusalem u la iam naka bynta jong ka! Balei? Ki Pharisi ki dang mutdur ba ki Paidbah ki la ia bud ia u Jisu hynrei phewse ymdon uwei ruh, ka daw ka long ba ki ia pyrta matlah matdpei khlem da tip ia ka jingmut uei uta u syiem ki Jiw ia uba ki ia Pyrta! U Jisu u la iohi ia ka dohnud ki Israel ba ka long thylli ba kim da tip shisha ba u Jisu u dei u syiem jong ki hynrei ki shu pyrta shongshit. Na kata kadaw u Jisu u iam. U ong – Ah lada pha (Jerusalem) la lah tip lypa, ba mapha ruh shisha ha kane ka sngi ia kiei kiei ruh kiba dei ki jingsuk jongpha hynrei mynta la buhrieh iaki na ki khmat jongpha. (U Jisu u kren shaphang ka Jerusalemu ong – ki sngi kin jia hapha ki nongshun jongpha kin ker tawiar iapha….. yn ym iehnoh maw halor u maw naba pham shym la iathuh ia ka aiom ka jingwan jngoh ia pha. Lukas 19:28-44.

Ka pyrthei Israel ka la leit bud ia u Jisu tang lada ka Temple ha Jerusalem namar la buh rieh na ki khmat jong ki ba kin ymiohi shisha ba u Jisu u dei u syiem jongki uba lawan ha ki. Dei na kata ka daw ka la long lehnohei ba ki pharisi ki sheptieng ba ki paidbah Jiw ki la bud ia u Jisu, phewse ymdon eiei. Bun na ki Jiw na ki Nong Jerusalem ki la shah ring mraw pynban sha kylleng hadien kane, ia ka Temple jong ki la pynjot noh ha u snem 70 AD nakadaw ka jingpyrta matlah u syiem ki Jiw u syiem ki Jiw pynban ymdon ka jingngeit hapoh ka donnud jong ki.

U Jisu u ieit shisha ia ka jaid bynriew Jiw bad ia ka pyrthei hi, hynrei ki Jiw te kim mon. u ong katno sien nga kwah ban kdup ia ki khun jong pha (khun Jerusalem) hynrei phate phammon. Kumta ia ka Ri jongpha la iehnoh hapha kum ka ingjah. Naba nga ong hapha –Phan ym iohi shuh ia nga naduh mynta (namar un leit shabneng) tat ynda phan ong – Long ba la kyrkhu ia uta uba wan ha ka kyrteng u Trai. Mathaios 23:37-39. La iehnoh ingjah ia ka Jerusalem naduh u 70 AD – 1945 AD.

Shisha la jia kumta ki Israel ki la duh noh ia la u syiem tad ynda kata ka por kaba kin shai ki khmat jong ki bad kin khot kyrpad ia ka kyrteng u Trai Jisu kum u Messiah jong ki.

Hooid ka pyrthei Jiw ka la bud matlah ia u Jisu. Hynrei ka pyrthei Jentil ka la pdiang ia u. Shisha, mynta kumba ka long – ka pyrthei kala leit bud iau Jisu – Amen.