U bah P Tynsong, symbud myntri rangbah, ka kong Grace Mary Kharpuri bad U bah TG Nengnong, Secretary, PWD, haba plie ia ka surok Dawki Bholaganj, ha Hat Thymmai, ha ka Sngi Thohdieng.
Shillong:Ha kaba plie ia ka surok border na Iarbamon sha Bholaganj, kaba 16.5 Kilometre myn hynnin ka sngi ha Hat Thymmai, kaba don ha Pynursla Sub Division; la sdang ia ka jingialang, da ka jing mait phang, da U bah TG Nengnong, Secretary, PWD (R & B), ha kaba u pynsngew ba ka jingdon ki surok kiba bha, kan kyntiew ia ki nongrep bad kyntiew ia ka rukom im jongki na ka por sha ka por.
U Bah Pahuh Massar, Sordar ka Raid Nongshken, haba kren ula pynpaw, ba kane ka surok, ka dei kaba la khot kum ka Lyngkhat Tmar, ha kaba la shu iohi, ba ka don tang ka dak ka shin, hynrei, kaba ym lah satia ban pyndonkam. U Sordar, ula ong shuh shuh ba ha ki snem ba ladep, ba U MLA bad ka MDC, da ka khmat lajong, ki wan shane man ka por, ki iohi bad ki tip, kaei ka jinglong jong kane ka surok bad mynta ka la kylla bak lybak bad ula ong shuh shuh “Kordit shisha, ia kito kiba iohi, hynrei ki matlah, ki iohsngew, hynrei ki kyllut”.
U Sirdar ka Elaka Nongjri, U Bah Napoleon Siej, ha ka jingkren jongu, u ong ba u sngewkmen, mar ia tip ia ka jingbuh maw nongrim, ia kane ka surok khappud, kaba la khmih lynti, da ki phew tylli ki snem, ban pynurlong ia kane ka surok, kaba dei u thied snam jong kane ka thain khappud.
Na ka liang jong ka kong Grace Mary Kharpuri, MDC, ha ka jingkren jongka, ka ong ba ka Hat thymmai, ka donbok haduh katta, namar ba da ki phew snem, ki la phohsniew ia kaba kum kane ka surok ban ioh bad ka kong Grace, ka long “Ka la don shisha ka jingkylla kaba bak ly bak”. “Ha ki por kiba mynshwa, kiba ngi wan, teng teng hap pyrkhat, ban wan, namar ba ki kali ruh kim shan”. La ong biang ka MDC “Nangne shakhmat, khamtam hangne ha shnong Nongthymmai, kin bun ki ban wan jngoh kai ia kane ka jaka, ka long kaba ithiang haduh katta. Ka don sa kane ka hat, kaba ju pynlong arsien lane shi shisien taiew bad kane ka hat ruh kaba khring bha, ym tang na ka thain jongngi, hynrei na kylleng sawdong kaba dei kaba la bna ha kane ka jylla jongngi”.
Ka kong Kharpuri, ka ong shuh shuh “Nga hap ban ai jing iaroh shisha ia kane ka sorkar MDA, namar nga iohi, ba ki iohi jngai bad ki trei shitom”.
U bah P Tynsong, symbud myntri rangbah, haba kren, u iathuh ba kane ka projek, kan pyn myntoi ia ki ar tylli ki Constituency, ka Shella bad ka Pynursla Constituency. “Nga ruh la slem bah, nga phohsniew, ba lada ngi don ia kane ka border road, naduh Dawki, Lyngkhat, Hat thymmai, poi sha Nongjri, poi sha Bholaganj, kan long ka jing kyrkhu kaba khraw”. La ong shuh U Bah Tynsong “Ka jing phohsniew, ngi ioh thoh team mynta ka step, ngi buh maw nongrim mynne, shwa ba ngin wan ha kane ka jaka”.
U bah Tynsong, u ong shuh shuh ba ka surok Dawki, Bholaganj road, dei ban pyndep hapoh ar snem, lada ym pyndep, ia ki lai ngut ki kontraktor, yn black list. “Nga shu ai warning, sngewbha pyndep ia ka kam bad I MDC, ila ai lypa ia ka yellow card. Yellow card, ka long ba phi trei bakla, u paidbah, un nym ai thiah ai dem”. La ong shuh U bah Tynsong, ba ka PWD, ka la buh ia ka monitoring system, ka dei kaba khlain haduh katta katta bad u ong ruh ba lada ki bor shnong, ki iohi, ba don kano kano kaba i artatien, sngewbha pyntip wut wut, ka la don ka cell kaba kyrpang. “Ngi kwah ban iohi ia ki surok kiba ngi shna, kan neh kan skhem bad kan pyn myntoi ia ki paidbah jong ka jylla baroh kawei”. U bah Tynsong, u kynnoh ruh ba ki kontraktor, ha kine ki sngi, haba ki trei ia ka kam, kaba shi spah tyngka, hynrei ki kwah thep pla 60 tyngka. Trei 40 tyngka”.
La ong shuh shuh U bah Tynsong ba ynda la dep kane ka surok, na Iew Shella, ki lah ban wan sha hat thymmai, ki lah ban wan haduh ha hat Lyngkhat bad ki lah ban wan haduh ha hat Dawki bad kim donkam shuh ban iaid na kitei ki main road, hynrei kin iaid na ka border road. La iathuh shuh ba ha ki khyndiat sngi, ban sa wan, yn leit buh surok sa kawei ka surok border, kaba dei sha Dangar, kaba ka jinglut kan long T.50klur bad katei ka surok, kan pyn iasoh na Dawki, sha Nongjri, Shella bad yn pyn iasoh sha Mawsynram Constituency.Ka jingtrei ia katei ka surok, ka shongdor T.80.04,53,000 bad yn tei ia katei ka surok khappud, da U bah Rinaldi Ryngksai, Bah Borin Shadap, Bah Lester Syiemlieh bad ka kong Banalari Khongwar, ha kaba U bah Lester bad ka kong Khongwar, ki ia trei lang da ka Joint Venture.
Ki surok, ki dei ban neh, ong ka MDC
“Nga kyrpad rit ia ki kontraktor, ha kane ka sngi, ba hap ban, trei ha kata ka rukom, ba ki surok, ki dei ban neh. Ba bunsien, ha ka jingiaid lynti jongnga, ngi dang ioh surok, tang hadien shibnai, shibnai duna ka lah sniew, namar ba ka quality kam biang. Ka dei ban don ka quality, ka duration, ka ban neh, ka ban sah; ba ka sorkar ruh kam dei ban mang na ka por sha ka por”.
Phi don ban ong eiei?