Ka UDP ruh ka la nang

U General Secretary jong ka seng UDP, ula dawa, ba dei ban pynhiar shuki mardor ia u myntri bor ding ka sorkar jylla bad kumjuh ia U Chairman Cum Managing Director jong ka MeECL bad katei ka jing dawa jong u heh UDP, ka pynkhluit tar ia ki samla NPP, ha kaba ki la kynnoh, ba U Bah Jemino Mawthoh, kyrtong MP barim, u dei u riew shim kabu.

Mar kumta hi, la iohi, ba ki mih shibun ki sur bad na ka liang jong U Ma Lahkmen Rymbui, myntri kam poh iing, uba dang shu shah sangah shen ialade ha ka seng BJP, ula iathuh ba ka rai ban weng ia u myntri bor ding, kam dei satia, kaba la ia rai da ki MLA, hynrei u kynnoh, ba ka dei ka jingkren hi jong U Secretary ka UDP; katba ha kawei ka liang ka Shillong City unit jong ka UDP, ka kren shai, ba ka kyrshan tyngeh ia ka jing dawa hiar shuki jong U bah Mawthoh bad ha kajuh ka por, ka kren tam ruh, da kaba ong, ba kin dawa, ba dei ban weng noh ia ka jing kyrshan ia kane ka sorkar NPP.

Ym donkam ban ia tai jylliew than, hynrei, la shu iohi, ba ka UDP ruh ka la nang ha kine ki sngi bad ka la shim, da kajuh ka buit, ba ka leh ka seng BJP bad kata ka long ba ki MLA, ki kren da kumwei, katba ki nongtrei parti ki kren da kumwei pat.

Lada jia ba ki nong ialam UDP, kin dang iai bteng ban kren ha kane ka dur, kumta ka jing ia lehkai, ka la sdang itynnad, namar ba ka BJP, ka la nang pynkhreh ban mih noh ialade na kane ka sorkar, halor ka nongrim jong ka jing bamsap bad ka UDP ruh, la imat, kumba ka la pynkhreh ia ki kuli jongka, halor katei kajuh ka mat bad kitei ki ar tylli ki seng, ki la stad, ha kaba ki iohi, ba haba ther tyngeh ia U Mukul Sangma, ha u snem 2018, da ka jing bamsap, ba ka la siew dor bha bad na kitei ki dak, la iohi, ba ha ka elekshon 2023 ruh, kin iaid da kajuh ka ishu jing bamsap jong ka sorkar NPP.

Ka elekshon MDC ha Garo Hills, ka la nang jan bad wat ka jing pynkhreh elekshon MLA ruh kam jngai shuh; kumta, ka UDP, lada ka la nang ban shna ia ki ishu (kumba ki leh ki nong ialam jongka ha kine ki sngi), kumta, ngin sa nang iohi, ha ki bnai ban sa wan, ba kin nang mih ki jyrsih ba har rukom bad kaba kan nang kham jubor ruh, ka jing ia ther mar kylliang, namar ba ki ar tylli ki kynhun synrop jong ka NPP, ki la pynap kuli bha ialade ban bud dien ia ka trei ka ktah jong ki Sangma shi para.