KA JINGIAWANG KTIEH – HATO DEI KA JINGIEID JAITBYNRIEW NE DON KI JINGTHMU SHA LYNDET?

Kaei kaba pynlong ia ki nongialam, ki riewsain pyrthei, ki seng bhalang ba kin sngewtynnad palat bad kim ngiah satia ban ia kawang ktieh ne ban ia kdew kti ia ka jingdkoh jong ka tnad bording bad ia ka jingpynlip lait (load shedding) khari khari? Ki da ai jingmut ruh ba lada weng noh ia u James na ka shuki Myntri Bording bad ia u Kembhavi naka shuki CMD ka MeECL, kan wanrah shisha ia ka jubab bad ba kine ki jyrwit jyrwat ha ka department kin jah noh.

Hooid, ka bording ka dei ka jingdonkam ba kongsan ia baroh naduh ki duk ki suk haduh ki binong ki bishon khamtam ha kane ka juk mynta, lada duh bording, kan wanrah lut ia ka jingdkoh ha bun ki liang bad ha ki tnad treikam. Man ka tlang ha Meghalaya lada ngi phaidien, ngi iohi ba ju don beit hi kata ka load shedding, ym dei kaei kaei ba dang shu jia shen. Tangba lada ngi bishar bniah, ym dei tang ka bording ba ngi donkam na ka bynta ka roi ka par lane ka kamai ka kajih; ngi donkam ruh ia ki surok kiba bit ba biang kiba long u budlum ha ka roi ka par bad kumjuh ka um bam um dih, ka koit ka khiah, ka pule puthi bad kiwei kiwei de.

Ki jingduna ki paw shynna ba ym dei tang ha ka tnad bording, hynrei ngi iohi ia ki jingdkoh ha kiwei de ki tnad bad bunsien ngi iohsngew ia ki jingud jingnam ka jong ki paidbah ia ka jingsniew surok, jingduna um, jingkiew dor ki marbam mardih, ka bai kali, ka jingbym biang bad jingduna jong ki nonghikai ha ki skul khamtam sha ki nongkyndong bad bun kiwei pat lada jer lut hangne kan nym kut shuh. Kaei ka jingmut ba nga jer ia kitei ki jingdkoh haneng ka long ba lada kine ki nongmihkhmat, nongialam bad ‘riewshimet ki dei shisha kita kiba ieid jaitbynriew, ki lah dei ban ia peitngor bad ai jingmut kumno ban pynbha ia kitei ki tnad ruh, ym ban shu takrain tang ia ka tnad bording.

Ngam tip lehse ki don la ki jong ki jingthmu ha lyndet ki jong ki, namar ka kam politics ka long kaba jyrsieh, bad kane ka jingkawang ktieh ka jong ki lehse ka long tang ban shu pynthame bad pynthohbria iano iano lane ban ialam bakla ia u paidlang, tangba lada phi ia ieid jaitbynriew shisha, ko nongialam bad nongmihkhmat badonburom! sngewbha ban ia ieh shadien ia ka jinglong khwan myntoi shimet jong phi, hynrei ban buh ia u paidbah ha khmat kumba phi lah bam smai ruh ban shakri ia ki haba phi lah khlei la ki juban lak ha ka por ba phi kyrpad ban ioh jingkyrshan na ki paidbah baieid ki jong phi.

Pynshngain Lyndem.