Khang maw ki nongniah trok, ia ka surok bah Shillong-Guwahati

Shillong, 6 Rymphang:
Hadien ba la thang ingkhong ia ka ophis ka DMR bad ka jingthew dewiong ha Umling ha kane ka sngi u Blei ba la dep, ki nongniah trok mynta ka sngi, ki la bitar jur ia ka rukom leh ki ophisar sorkar, ki la khang maw syndon ia ka surok bah National Highway-40 Shillong-Guwahati.
Ki nongniah trok ki la thang da ki taiar bad buh da ki maw ha surok ha kane ka janmiet sngi Thohdieng.
Halor kane ka jing jia, san ngut ki la shah kem halor ka jingdonkti ban khang maw ha surokbah.
Namar kane ka jingleh jong ki nongniah trok, ka jingiaid ki kali ka la thut haduh ba la hap ban tuklar da ki bor synshar district kiba la hap ban pahara ia ka surok. Kane ka jingjia ka la mih hadien ba ki nongniah trok ki la ngiah ia ka jingslem ban thew ia u dewiong bad namar ba la kynnoh ba ki la kit palat ia ka 9 ton. Kane ka jingjia ka la wanrah ia ka jingbitar ia ki nongniah trok kiba khe bhur bad khang maw syndon ia ka surokbah.
Kane ka jingjia ka la long ha ka por janmiet 3 baje eiei bad ka la jia ha ka thain Umsamlem haba ki nongniah trok kiba la bitar ia kane, ki la khang da ki maw bad thang taiar ban khang lad ia ki kaliban iaid.
U SP ka Ri Bhoi u CVS Reddy u la ong ba ki nongniah trok ki la khang ia ka surok Guwahati sha Shillong da ki maw bad thang taiar hynrei hadien ba la hiar ki bor synshar district bad ki pulit lah ban weng.
Halor kane ka jingjia san ngut ki nongniah trok ki la shah kem bad kane ka la wanrah shuh ia ka jinghuri hura ha ka surok hadien ba ki nongniah trok ki la iakhih puk.
Kiba shah kem ha kane ka jingjia ki long u Nedarabsuk Syntem (27), Marleki Suchiang, Damonmei Bang (25), Leaderson Dkhar bad u Bon Rymbai, baroh ki dei na shnong Nartiang ka West Jaintia Hills District.
Ki nongniah trok ki la ong ba ki hap ban iakhih pyrshah namar ba ka jingthew ia u dewiong ka long kaba slem palat haduh ba kin hap ban sah haduh saw haduh san miet ha surok tang ban ieng lain ban ioh thew ia u dewiong. la iathuh ba ka shim por haduh 45 minit ban thew ia kawei ka trok kaba la don da ki spah tylli kiba ieng lain.