Mih paidbah ki rangbah shnong ban pyrshah halor ka jingshah tam pud ka Raid Marwet

Nongpoh:Ki nongialam shnong lem bad ki riew rangbah na ki shnong bapher bapher, kiba hap hapoh ka Raid Marwet, hynnin ka sngi ki la iamih paidbah, da kaba pynlong jing ialang ha ophis u Syiem ka Raid Marwet, na ka bynta ban pyn paw ia ka jingpyrshah kaba khraw, halor ka jingwan kyntur pud da ka Shnat Hima Nong wah Mawtamur, Hima Sohiong Lyng dohship.

Ha katei ka jingialang ban pyr shah halor katei ka jingwan kyntur pud ka Shnong Hima Nong wah Mawtamur, la sakhi da ka jingdon u Paiem Ken Syiem, Syiem ka Raid Marwet, nangta arngut ki Basan na Hima Mylliem, ki Longsan Mansan na ka Raid Marwet, ki rangbah shnong lem bad shibun kiwei pat.

Lyngba katei ka jingialang, la jan baroh kiba la ai jingkren ha katei ka jingialang, ki la pynrem jur halor katei ka kam kyntur pud da ka Shnat Hima Nongwah Mawtamur, bad nalorkata halor ka jingpynlong jingialang ha Umtyrnga, namar ha katei ka sngi ki la pynbna paidbah, ba ki la don shibun ki shnong kiba hap baroh shikatta ha ka Raid Marwet, Hima Mylliem, hynrei mynta ki la hap hapoh ka Shnat Hima Nongwah Mawtamur, Sohiong Lyngdohship bad kiba la kop ruh ba ki don ia ki kot ki sla kiba biang.

Lah ruh ban kdew hangne, ba ha ka jingialang kaba dangshen ha Umtyrnga, ki Longsan Mansan ka Shnat Hima Nongwah Mawtamur Sohiong Lyngdohship, ki la kam ba ia katei ka Shnat Hima, la seng naduh ki por u barim bajah, kata ha ka 21 kyllalyngkot 1851, hynrei hadien katto katne por ka la jah noh, pynban la sdang ban pynkhieim biang ia ka ha ka 14 Sept 2019 bad ha u 18 Feb 2021.

Haba ther tyngeh ia ki nongialam ka Shnat Hima Nongwah Mawtamur, Hima Sohiong Lyngdohship, kiba la ai jingkren ha katei ka sngi, ki la ong ba shaei jah katei ka Shnat Hima Nongwah Mawtamur ha kine ki phew phew snem ba la dep bad ki la buh ruh ia u dak jingkylli, balei ki wan mih tad haduh kine ki sngi, kata hadien ba ki la ieh khunswet da ki spah snem ia ki khun ki hajar ha katei ka Raid.

Ki la don ruh kiba la ong, ba ia katei ka kam la leh sop sop da ki katto katne ngut ki briew bad ki la don ruh kiba ong ba ka jingthmu ka Shnat Hima Nongwah Mawtamur ban kyntur ia u pud ka Raid Marwet, ka long tang na ka bynta ka jingmyntoi ia ki katto katne ngut bad kiba don ia ka jingthmu ban die pat ia ki khyndew ki shyiap.