Shillong:Ha ka 18 tarik u Lber 2021, u Myntri Rangbah jong ka Sorkar jylla, u Conrad K Sangma u la kyrpad ia baroh ki paidbah kiba long ki nong shong shnong jong ka jylla, ba kin ia mih shakhmat ban ai ia ka dawai tika injekshon Covidshield khnang ba kin ioh ia ka jingiada na ka jingiabit jong u khniang Covid 19 hadien ba kane ka khlam ka la wan ban lynshop ha kane ka jylla ha u snem 2020 bad kaba dang iai bteng sah haduh kine ki sngi.
Ha kajuh ka por u Myntri Rangbah, u la kyntu ia ki nongleit jingleit bad ia ki nongwan jngoh kai pyrthei ba ki dei ba ki dei ban pyntip sha ka sorkar jylla lada ki la ioh ia kane ka dawai tika khnang ba ka sorkar kan dup ioh lad ban buh jingkheiñ bad jingthoh thik pa thik.
U Conrad Sangma u la ong,”Katkum ka jing mad kaba ngi mad mynshem snem, ngi shem ba ka jingshlur ban mih shakhmat bad ka jingphikir ialade ka long kaei kaei kaba lah ban tehlakam.
Ia mynta ngim pat sngew iahap ban don ki jingteh pyrkhing hynrei ngim lah pat ban ong ba une u khniang un nym wan shuh bad baroh ka shong lut ha ka jinglong jingman jong ka pyrthei. Watla ngi la don ia u dawai bad ki nongpang ruh ki la kham duna hynrei ngim lah pat shu kheiñ sting noh kumto. Nga kwah ban ong lyngba ki lad pathai khubor ia ki paidbah nongshong shnong jong ka jylla ba ki dei ban shim lut baroh ki lad jingiada kumba ngi la shim ha ki sngi bad ki bnai kiba la leit bad ban iai bteng beit ia kine”.
Shuh shuh u lah ong ruh ba ka sorkar hi kan dang iai bteng ban peit bniah ia ki nongleit nongwan sha kane ka jylla khnang ban lah ban teh lakam ia une u khniang ha kane ka jylla bad kiba wan na sha ki jaka kiba shabar ki hap ban leh shwa ia ka test RTPCR hashwa ba kin ioh ban rung ha ka jylla.
Phi don ban ong eiei?