Mad jingeh ki nongshong shnong ka Pahamrioh naba slem pynpoi bill ka MeECL

Shillong: Ha ka 17 tarik u Lber 2021, ka Dorbar shnong jong ka shnong Pahamrioh kaba don ha ka them Ribhoi ki la pynpaw ia ka jingsngewkhia kaba jur halor ka jingbym lah jong ka Meghalaya Energy Corporation Limited(MeECL) ban pynpoi ia ka bill jong ka jingthang bording haduh ba ka la wanrah jingeh shikatdei eh ia ki longiing longsem kiba duk ba jynjar ban siew ia ka bai bording ka jong ki kaba la kot da ki hajar tyngka.

Na ka liang jong ka Dorbar Shnong Pahamrioh, ba la lamkhmat da u Rangbah shnong jong kane ka shnong, u Bah K Suting ryngkat bad ki longkmie jong kane ka shnong ki la pynlong da ka jingiakynduh lang haiing dorbar ban iashong pyrkhat ba kumno ban weng ia kane ka jingeh ba pynslem da ka MeECL ban pynpoi ia ka bill thang bording ka jong ki kaba ki pyndon ha la iing la sem.

Haba kren sha ki lad pathai khubor, u Bah K Suting u la ong ba kane ka jingleh jong ka MeECL ka la ktah shikat dei ia ki nongshong shnong jong kane ka thaiñ kiba shu im sngi ha ka kam bylla sngi kyndoi jakpoh ban bsa ban btiah ia la ka iing ka sem.

Na ka liang une u rangbah shnong u la kyntu ia ki bor ba dei peit ia kane kata ia ka tnad MeECL ba ka dei ban pyrkhat lem ha kaba iadei bad kane ka bynta ba kan pynpoi ia ki bill light man la u bnai khnang ba kan pynsuk bad jingsting ia ki nongshong shnong jong kane ka thaiñ da kaba kin ioh ban siew noh man la u bnai bad ba kan nym don kata ka ram ka shah.

Shuh shuh une rangbah shnong u la ong wat la ka long kaei kaei ka jingkmen ia ka shnong ka thaw hadien ba ka Sorkar ka la wanrah ia ka skhim Saubhagya na ka bynta u paidbah nongshong shnong kaba long ka skhim kaba ai ia ka bor elektrik ha man la kawei pa kawei ka thliew iing hynrei ka long pat kaei kaei kaba sngewdiaw mynsiem hadien ba la ioh ia kane ka skhim ka jingpynpoi ia ka bill light pat ka long kaba slem bad kaba shim por ruh da ki snem, kane ka wanrah ia ka jingsiew ia ka bill light shisien shisnem bad kane ka buh jingeh shikat dei eh ia u paidbah jong kane ka shnong.