Ki khyndew jong ka MeSEB shano kine kin poi lada la lilam ia ka MeSEB sha ki kaia ne ki heh saipan na bar ri?

Ha

Ki Nongsynshar Shnong,

Nongsynshar ba don burom,

Ka bording elektrik ka dei kawei na ki jingdonkam ba kongsan jong ki paid nongshong shnong bad ka dei ka marbam ba kongsan.

Katne ka jyrsieh ka tnat shalan bad pyniaid bording jong ka Jylla bad khlem pep kane kan ktah ia ki nongshong shnong ha ki por ban wan nangne shakhmat. Ka bai bording kan kiew kum u roket bad ka jingduh bording kan iai long lynter tait.

Hato kam dei mo ba ki Dorbar shnong kiba im ba trei na ka bynta ka bha ka miat ki nongshong shnong kin iapyrkhat lem na ka bynta u paid nongshong shnong u ban sa shah ktah na ka jingkiewdor bad jingduh bording?

Sa kawei bad kaba kham kongsan lada ki engineer MeCEL, kiba bun mynta ki dei ki trai Ri kiba treishitom bad iaksaid ba kane ka tnat kaba dei ka nongkynti jong ngi kan neh, kim ioh ka jingkyrshan na ki nongshong shnong ka la shitom bad khala khala kane ka tnat kan sa leit sha ki kti ki heh saipan company na bar ri.

Ngi kynmaw kum ki khun ka Ri ba naduh SESU ha Secretariat Hill haduh Byrni ki khyndew jong ka MeSEB shano kine kin poi lada la lilam ia ka MeSEB sha ki kaia ne ki heh saipan na bar ri?

Nga kyrpad ia ki Dorbar Shnong ban shim khia ban iakren, iakhih bad tuklar halor kane ka mat.

Khublei

Kyrsoibor Pyrtuh.