T.9klur, siew ka West Jaintia, ia ka bai thang ding; ka South Garo kam siew shi naia ruh

Shillong:U Myntri ba dei peit ia ka tnad bording u James K Sangma, haba jubab ia ka jingkylli u bah George B Lyngdoh (Congress), u la iathuh ba ka jingpyntrei kam ia ka jingmap ram ba shisien lane ka One Time Settlement skim, ka long ban iohbiang ia ka bai ding, kaba sah bun. U la iathuh ruh ba ki nongthang ding, kiba la wan shakhmat ban shim ia kane ka jingailad lyngba ka One Time Settlement skim ki long 3152, ha kaba haduh ka 28 tarik u Rymphang 2021, la ioh lum T.19,02, 47,452.00 /- ia ka bai ding kaba sah.

Haba jubab ia ka jingkylli bynrap u Myntri u la ong ba ka bai ding, kaba sah baroh ka long T.544 klur bad ha dien ka 31 Lber 2021 ka MeECL kan leit ban ot naphang ia kito ki meter kiba khlem siew ia ka bai thang ding.

U myntri, ula ai jingkhein ruh ia kito kiba siew bai thang ding bad kitei ki kynthup ia T.7,25,45,196 ha Ribhoi District, T.64,47,402 ha East Khasi Hills District, T.42,15,570 ha West Khasi Hills District, T.35,005,375 ha South West Khasi Hills, T.64,35,576 ha East Jaintia Hills, nangta T.9,47,27,905 ha West Jaintia Hills, T.13,14,162 ha East Garo Hills, nangta T.1.12,400 ha West Garo Hills, nangta T.1,89,583 ha North Garo Hills bad nangta sa T.7,29,303 ha South West Garo Hills bad nangta ka South Garo Hills, kam shym la siew satia tang shi naia ioh, ha katei ka jingsiew ia ka bai ding kaba dang shah jong ka tnat MeECL.