Jowai: Kawei ka longkmie kaba la tip kyrteng kum ka Roimon Siangshai, kaba na ka shnong Pdeintalo jong ka thain khappud Lapangap bad Karbi-Anglong, ka la ujor Ejahar pyrshah ia ka Balang Catholic Pdeintalo da kaba kynnoh ba katei ka Balang ka la sei ia ka pisa jong ka napoh bank Account ia kaba ka la ioh kamai, na ka kam bylla 100 sngi lane ka MGNREGS.
Katei ka longkmie ka la mih shakmat ban ujor haduh lai tylli ki ejahar pyrshah ia u Secretary Shnong uba bat ruh ia ka kam Secretary VEC, u ma, Telmi Dkhar halor ka pyndonkam bakla ia ka bor halor ka kam sam khaw rashon bad ai Job Cards, kawei pat pyrshah ia utei u Secretary Shnong bad dkhot shnong u ma Telmi Dkhar bad u para kur jong u, u Pyrkhat Dkhar halor ka jingkynnoh ba kitei ki arngut ki la knieh jubor ia ka jaka jong ka bad kawei pat pyrshah ia ka a Balang Catholic ha kaba utei u Telmi Dkhar u long kum u rangbah ha katei ka balang bad uba dei ruh u Nonghikai Skul SSA.
Ha ka jingujor jong ka halor ka kam sam khaw rashon bad ai Job Cards katei ka long kmie ka la kynnoh ba naduh u snem 2014 haduh mynta ym shym la ai khaw BPL satia ta ka Eiporlang Siangshai. Ka la pynpaw ruh ba katkum ka kyndon jong ka MGNREGA tang kawei ka Job Card ha kaweika thliew iing katba ha katei ka shnong u Secretary VEC uba dei ruh u Secretary Shnong u la pynioh Jobcard haduh khamta ia kiba ha iing hasem jong u u dang pynioh haduh 2 tylli ki Job Card ha kawei ka longiing.
Shuh ha kaba iadei bad u khaw baduk ha kane ka por Lock Down ba la dep, u la sam tang sha ki para kur bad ka jait shylla, la kynnoh katei ka longkmie. Utei u Secretary Shnong u la kren kop ruh ban pyntyrkhong koit ia ka jait jong nga ha kaba ia kane ka jingkren jong u la sakhi ruh da u Rangbah shnong ka Lapangap A, la kam katei ka longkmie.
Shuh shuh ka la kynnoh ba haba pan ia ka Certificate Shnong, utei u Secretary Shnong um ju ai bad lada u ai ruh u ai pynban da ka Xerox copy katba ia kaba u la soi hi da u khulum um ju ai.
“U la leh jubor halor ki jaka puta jong nga da kaba tih um hapoh ka kper jong nga bad pynjaboh ia ka pynthor kba jong nga”, la ong katei ka kong Eporlang.
La kynnoh shuh shuh ba ka pisa kaba ka la ioh kamai na ka kam bylla 100 sngi u la ot noh haduh T. 5093.00p bad um shym la pynphai shuh haduh mynta. Shuh shuh ka Khlaw Balang Catholik kaba la rai ban ai jaka shna iing ia ki bym don jaka, la ai tang ia ki para kur jong u.
“Utei u Secretary ka shnong u la shim hi ia ka bor baroh ha lade tang namar ba u Rangbah Shnong udei u briew u bym don satia ka jingnang jingstad”, la pynpaw katei ka longkmie bad kyrpad ruh ia ki bor pulit ban tohkit bniah ia kane ka jingeh jong ka bad kiwei pat ki para shnong ha kaba iadei bad ka jinglehbor jong utei u Secretary Shnong pyrshah ia ka hok jong ki.
Ka pyrthei kulmar