Siew phim siew, katba phi mon, ong ka nongtrei MeECL

Nongpoh: Kawei ka longkmie na ka shnong Mawpun Kshaid, ka la kynnoh ba ka la shah kren tohmet bad shah kren kum bym mon ha ki nongtrei MeECL ha Umiam, kata ha ka por ba katei ka Longkmie ka dang thmu ban leit kylli na ki nongtrei MeECL, namar ba ka la ioh ia ka Bill Light (Bai bording) kaba la kiew kynsan hapoh ka iing jong katei ka Longkmie.

Haba batai halor katei ka jingshah kren tohmet ha ki nongtrei MeECL Umiam, ka Kong Banrihun Susngi, kaba la wan ryngkat ka Kmie jong ka lem bad ki nongialam ka CoRP, ka la ong ba la don ka sngi kaba ka la thmu ban leit kylli na ki nongtrei MeECL, halor ka jingkiew kynsan ka bai bording, hynrei ka la iohsngew pynban ia ka sur kumba kynhied ha ki nongtrei MeECL, kiba la ong ia ka “Siew phim siew, katba phi mon” bad la kynnoh ruh ba katei ka nongtrei MeECL, ka leh bymmon bad kam batai wat tang khyndiat ruh.

Katei ka Longkmie, ka la iathuh ruh ba hapoh ka iing jong ka, la ioh bording lyngba ka skim baduk (BPL), nalorkata hapoh ka iing jong ka, ym shym la donkam bording ha kino kino ki bynta, namar ym don TV, Fridge, Heater lem bad kiwei ki tiar ba donkam bording bad hapoh ka iing jong ka, don tang 3 ki Buld bad dei nakata ka daw kaba la pynkyndit eh ia ka ba ka bai bording kan poi haduh T. 4 hajar hapoh shibnai.