Phah tohkit ka sorkar, da ar ki heh pulit rHalor ka jingiap u pulit ka Patharkhmah

Shillong, 4 Rymphang:
Katba kiba haiing hasem jong u Police Sub-Inspector Bah PJ Mar baniang uba la khlad, ki dawa ban thung da ka jingtohkit kaba laitluid da ka CID ne ka CBI ban tohkit halor ka jing kynnoh shah pyniap une u heh pulit, ka sorkar pat ka la thung da ka jing tohkit ka ban leh hi da ki pulit ka Special Investigation Team (SIT).
Haba kren sha ki nongthoh khubor mynta ka sngi, u Myntri Rang bah ka jylla u Mukul Sangma u la ong ba ka sorkar ka la leh ia kaba donkam ha kaba ki pulit kin pynlong ia ka jing tohkit kaba bniah halor kane ka jingkynnoh shah pyniap jong u heh pulit. U la ong ba ia kane ka kam, yn tohkit da u SP ka Shillong City u Bah Vivek Syiem bad u IGP Bah H Marbaniang.
U Myntri Rangbah u la ong ba ka SIT kan ai ia ka kaiphod jongka hapoh khyndai sngi naduh ba la pynmih ia ka jingpynbna ba la thaw ia ka jingtohkit bad bynrap ba ka sorkar ka shaniah ha ki ophisar bad ym dei ban sngew artatien ia kane.
Katkum ka jingong u Sangma kumba ju long la pynlong ia ka jingtohkit haba don ka jingiap kaba khyllah bad hadien ba la ioh ia ka kaiphod, ka sorkar ka lah ban hukum ban thung da ka jingtohkit kaba laitluit.
“Kane ka SIT kan leh ia ka kamram katkum ka ain ba la pynkup bor”, la ong u Mukul bad u ong shuh shuh “Ngi shaniah ha kane ka kynhun ban sei ia ka jingshisha’.
Ka sorkar ka la rai ruh ban rejister kes, ia kane ka jingkhlad une u heh pulit kum ka kam kaba shah pyniap bad ka la thaw ia ka Special Investigation Team (SIT) ban pynlong ia ka jingtohkit halor kane ka jingjia.
Ka dei ha ka 24 tarik Kyllalyngkot ha kaba ka met jong u Bah Marbaniang la lap ba la phlei snam na ka jingdei kuli na khlieh shi sngi hadien ba u la bat ia ki 32 tylli ki trok kiba kit dewiong beain sha Assam kiba pynkhein ia ka hukum ka NGT.
Nyngkong ki pulit ki la kam ba ka dei ka jingpyniap hi hynrei ka jingkren kyllain jong ka tnad pulit, ka la wanrah ia ka jingpynrem na kiba bun halor kane ka jingiap jong une u heh pulit.